“Manchester Yunayted” klubi yozgi transfer oynasida jamoa tarkibini kuchaytirish bo‘yicha jiddiy rejalarni boshlab yubordi. Mahalliy va xalqaro nashrlar yozishicha, klub rahbariyati ayniqsa yarim himoya chizig‘ini qayta qurishga katta e’tibor qaratmoqda.
Ruben Amorim boshchiligidagi jamoa joriy mavsumda markaziy zonalardagi barqarorlik yetishmasligini yaxshi his qildi. Shunday ekan, yozda yangi transferlar orqali muvozanatni tiklash rejalashtirilmoqda. Klubning yuqori rahbariyati bu yo‘nalishda faol ish boshlagan va ehtimoliy nomzodlar ro‘yxatini shakllantirmoqda.
Ma’lumotlarga ko‘ra, “qizil iblislar” skautlari bir vaqtning o‘zida bir nechta Yevropa klublaridan bir necha yosh va istiqbolli yarim himoyachilarni kuzatib kelmoqda. MYUning short-listida Karlos Baleba (“Brayton”), Elliot Anderson (“Nottingem Forest”), Adam Uorton (“Kristal Pelas”), Anjelo Stiller (“Shtutgart”), Konor Gallagher (“Atletiko Madrid”) va Andrey Santos (“Chelsi”) kabi nomlar bor.
Bu futbolchilarning har biri turli liga va uslubda o‘ynasa-da, ularda MYU izlayotgan umumiy jihat — kuchli pressingda faol bo‘lish, uzatmalar aniqligi va markazda tez qaror qabul qilish qobiliyati mavjud.
Karlos Baleba bu mavsumda “Brayton”da o‘zini yaxshi ko‘rsatdi — u nafaqat to‘p uchun kurashda, balki himoyadan hujumga tez o‘tishda ham samarali o‘yin namoyish etmoqda. Elliot Anderson esa “Nottingem Forest” tarkibida yosh bo‘lishiga qaramay, hujumlarni boshlashdagi ijodkorligi bilan skautlar e’tiborini qozongan.
Adam Uortonning nomi Angliya matbuotida so‘nggi haftalarda tez-tez tilga olinmoqda — u “Kristal Pelas”ning asosiy tarkibdagi barqaror o‘yinchisiga aylanib, jamoa markazida muhim rol o‘ynamoqda. Shu bilan birga, “Shtutgart” futbolchisi Anjelo Stiller Germaniya Bundesligasidagi yuqori pas aniqligi bilan ajralib turibdi.
Konor Gallagherni esa “Atletiko Madrid” o‘z safida saqlab qolmoqchi, ammo “Manchester Yunayted” uning transferini amalga oshirish uchun jiddiy qadam tashlashi mumkin. Andrey Santos esa “Chelsi”ning yosh umidvorlaridan biri bo‘lib, himoya va hujumdagi universalligi bilan ajralib turadi.
Tahlilchilarning fikricha, bu qadam “Manchester Yunayted” uchun kelgusi mavsumdagi strategiyaning bir qismi. Klub yosh, energiyaga to‘la va texnik jihatdan mukammal futbolchilarni jamoaga jalb qilish orqali uzoq muddatli barqaror tarkib yaratishni maqsad qilgan.
Hozircha qaysi nom asosiy ustuvorlikka ega bo‘lishi aniq emas, ammo shu narsa ma’lumki — “Manchester Yunayted” yozgi transfer oynasini faol o‘tkazish niyatida va jamoa markazini kuchaytirish bo‘yicha jiddiy ish olib bormoqda.
“Zamin”ni Telegramʻda oʻqing!
