"Liverpul" Angliya Premer-ligasi 10-turida "Brentford" maydonida 3:2 hisobida mag'lub bo'ldi. Ushbu uchrashuv 25-oktabr kuni "Brentford Community" stadionida bo'lib o'tdi.
Euro-football.ru ma'lumotiga ko'ra, Liverpul bu bahsga favorit sifatida kirib kelgan edi. Uchrashuvning 5-daqiqasida "Brentford" hujumchisi Danqo Uattara hisobni ochdi.
Birinchi bo'lim oxirida Kevin Shade ikkinchi golni urdi va mezbonlar 2:0 hisobida oldinga chiqdi. Liverpulning birinchi javob goli 45-daqiqada Milosh Kerkes tomonidan kiritildi.
Ikkinchi bo'limda "Brentford" hujumchisi Igor Tyaqo 60-daqiqada penaltidan gol urdi va hisob 3:1 ko'rinishini oldi. 89-daqiqada Mohamed Salah Liverpulning ikkinchi goliga mualliflik qildi, biroq bu natijani o'zgartirmadi.
Ushbu natijadan so'ng "Liverpul" 15 ochko bilan turnir jadvalida oltinchi o'ringa tushdi. "Brentford" esa 13 ochko to'plab, o'ninchi o'ringa ko'tarildi.
Ma'lumot uchun, Liverpul avvalgi beshta o'yinda Brentford ustidan ketma-ket g'alaba qozongan edi. Shu bilan birga, jamoa so'nggi uchrashuvda "Ayntraxt"ni 5:1 hisobida yengib, to'rt o'yinlik mag'lubiyatlar seriyasiga barham bergan edi.
