“Arsenal” klubining afsonaviy sobiq bosh murabbiyi Arsen Venger "El Klasiko" haqida fikr bildirdi, deb yozdi Marca. Uning ta’kidlashicha, “Real Madrid”ning bu galgi g‘alabasi tasodif emas — jamoa aniq taktik reja va ruhiy barqarorlik orqali g‘alaba qozongan.
“Xabi Alonso bugungi kunda juda puxta ishlayapti. U “Real”ni muvozanatga keltira oldi va jamoa maydonda har bir pozitsiyada aniq vazifa bilan harakat qildi. Hozirgi “Real” ayrim jihatlarda “Barselona”dan ancha tartibli va hissiyotli o‘ynadi”, — dedi Venger.
Mutaxassisning so‘zlariga ko‘ra, madridliklar birinchi navbatda himoyada o‘ta ishonchli tuzilma yaratgan. ““Real”ning himoya chizig‘i katta farq bilan “Barselona”nikidan ustun edi. Ular raqibga hech qanday bo‘shliq qoldirmadi. Hujumda esa har bir vaziyatda gol urish ehtimoli yuqori ko‘rindi”, — deb ta’kidladi u.
Kataloniyaliklarning hujumdagi harakatlarini esa Venger unchalik samarali deb baholamadi. Uning fikricha, Levandovski va Rafinyaning yo‘qligi “Barsa”ni jiddiy zaiflashtirgan. “Katalonlar hujumda tishsiz bo‘lib qoldi, raqib himoyasini sindirishda aniqlik yetishmadi. Mbappening penaltidan foydalana olmagani vaziyatni yanada keskinlashtirdi, ammo “Barsa” shundan keyin ham xavfli ko‘rinishga ega bo‘lmadi”, — dedi u.
Venger Xabi Alonso ishini alohida olqishlab, uning jamoaga singdirgan intizomi va muvozanatini e’tirof etdi. “Alonso “Real”ning himoya chizig‘ini juda aniq muvozanatga keltirgan. Bu juda katta mahorat talab qiladi. Hozirda har bir murabbiy o‘z jamoasini ruhlantirish va tartibga solish ustida ishlayapti. “Real” bu borada boshqalardan bir qadam oldin”, — deya fikr bildirdi fransiyalik mutaxassis.
Venger fikricha, "El Klasiko" har ikki jamoa uchun ham faqat natija emas, balki psixologik sinov bo‘ldi. “Bu ikki klub doimo oliy maqsadlar uchun kurashadi. Ular uchun har bir "El Klasiko" — yangi bosqichning boshlanishi”, — dedi u.
Ma’lumot uchun, La Liganing 10-turidan so‘ng “Real Madrid” 27 ochko bilan musobaqa jadvalida peshqadamlikni saqlab qolgan bo‘lsa, “Barselona” 22 ochko bilan ikkinchi o‘rinda bormoqda.
Shu tariqa, Vengerning tahliliga ko‘ra, bu safar g‘alaba “Real”ning taktik tartib va ichki uyg‘unlikni to‘liq topganidan dalolat beradi. Alonsoning ish uslubi nafaqat muxlislar, balki futbol dunyosidagi mutaxassislar tomonidan ham yuqori baholanmoqda.
“Zamin”ni Telegramʻda oʻqing!
