Ispaniyadagi so‘nggi “El-Klasiko” nafaqat maydonda, balki undan tashqarida ham jiddiy bahslarga sabab bo‘ldi, deb xabar berdi Foot Mercato. “Real Madrid” himoyachisi Daniel Karvaxal va “Barselona”ning yosh yulduzi Lamin Yamal o‘rtasidagi munosabatlar o‘yindan so‘ng keskin tus oldi.
Ma’lumotlarga ko‘ra, ikki futbolchi ijtimoiy tarmoqlarda bir-birini kuzatishni to‘xtatgan. Bu holat Ispaniya terma jamoasi atrofida ham ma’lum darajada xavotir uyg‘otgan. Milliy jamoa bosh murabbiyi Luis de la Fuente jamoa ichidagi muhitni barqaror saqlash uchun har ikki o‘yinchi bilan shaxsan suhbat o‘tkazishi kutilmoqda.
Tanishtirishicha, mojaro “El-Klasiko” paytidagi bir epizoddan boshlangan. Lamin Yamal o‘yindagi bahsli holatdan so‘ng “Real Madrid”ni g‘irromlikda ayblab, madridliklar hakam qarorlaridan foydalanganini aytgan edi. Bu gaplar internetda keng muhokama qilingan va ko‘plab “blankos” muxlislari tomonidan tanqidga uchragan.
Uchrashuv yakunida “Real” g‘alaba qozongach, Karvaxal raqib jamoa futbolchisiga nisbatan keskin munosabat bildirgan. Uning Yamalga qarata “juda ko‘p gapirma” degan ishorasi kameralarda qayd etilgan va ijtimoiy tarmoqlarda virusli lavhaga aylangan.
Futbol muxlislari va sport jurnalistlari bu holatni ikki avlod — tajribali sardor va yosh iqtidor to‘qnashuvi sifatida baholamoqda. Karvaxal 31 yoshda va jamoa ichidagi yetakchilardan biri bo‘lsa, Yamal 18 yoshda bo‘lib, hozirda Ispaniya terma jamoasining eng yosh va iqtidorli vingerlaridan biri hisoblanadi.
Ba’zi tahlilchilarning fikricha, mojaroning asosiy sababi — “Barselona” va “Real” klublari o‘rtasidagi uzoq yillik raqobatning yosh futbolchilarga ham ta’sir ko‘rsatishi. Karvaxal esa, o‘z navbatida, terma jamoa muhitini “jamoaviy birdamlik va hurmat asosida” saqlab qolish tarafdori.
Luis de la Fuente esa, yaqin kunlarda har ikki futbolchi bilan alohida suhbat o‘tkazishi kutilmoqda. Uning asosiy vazifasi — mojaroni terma jamoa ichida katta muammoga aylantirmaslik. Ispaniya terma jamoasi noyabr oyida Yevro–2028 saralash bosqichida muhim uchrashuvlarni o‘tkazadi va murabbiy jamoa ichidagi har qanday ixtilofni bartaraf etishni istamoqda.
Shu tariqa, “El-Klasiko”dagi jang nafaqat hisob, balki munosabatlar jihatidan ham iz qoldirdi. Karvaxal va Yamal o‘rtasidagi bu tartibsizlik Ispaniyadagi katta futbol raqobatining terma jamoagacha ta’sir o‘tkazayotganini yaqqol ko‘rsatdi. Muxlislar esa, har ikki yulduzdan maydondagi fidoyilikni saqlagan holda, sportchilik ruhini yo‘qotmaslikni umid qilmoqda.
“Zamin”ni Telegramʻda oʻqing!
