Ispaniya chempionatida allaqachon o‘nta tur o‘tkazildi. Madridning "Real" klubi turnir jadvalida yetakchilik qilmoqda va "Barselona"dan besh ochkoga ilgarilab ketgan.
"Qirollik klubi"ning ko‘plab futbolchilari turli statistika ko‘rsatkichlari bo‘yicha yetakchilik qilishmoqda, jumladan, yaratilgan gol imkoniyatlari (zarba uchun uzatmalar) bo‘yicha ham. Squawka maʼlumotiga ko‘ra, Kilian Mbappe La Ligada eng ko‘p imkoniyat yaratgan futbolchi (27 marta).
Ikkinchi o‘rinni Arda Gyuler va Pedri bo‘lishib olishgan, ular 25 tadan imkoniyat yaratishgan. Keyingi o‘rinda "Vilyarreal" futbolchisi Nikola Pepe (24) joylashgan, beshinchi o‘rinda esa Vinisius Junior (23) qayd etilgan.
Yaqinda "Santyago Bernabeu" stadionida o‘tgan "El-Klasiko"da "Real" "Barselona"ni 2:1 hisobida mag‘lub etdi.
