Ispaniya chempionatining o‘ninchi turidan o‘rin olgan navbatdagi “El-Klasiko” nafaqat maydondagi kurash, balki turli tahlillar bilan ham yodda qoldi. Unda “Real Madrid” kataloniyalik raqibini 2:1 hisobida mag‘lub etgan bo‘lsa, jamoaning sobiq afsonaviy futbolchisi Toni Kroos bu o‘yinda “Barselona” safida aynan qaysi o‘yinchi yetishmaganini ta’kidlab o‘tdi.
“Barselona” uchun eng muhim shaxs Inigo Martines edi, — dedi Kroos. — Men buni avval ham aytganman. U himoyadan chiqishni juda chiroyli tashkil etadigan, birinchi pasni to‘g‘ri beradigan futbolchi edi. Himoyachi sifatida u jamoaga tinchlik va muvozanat baxsh etardi. To‘g‘ri, unda tezlik yetishmasdi, lekin texnik jihatdan u ajoyib o‘yinchi bo‘lgan. “El-Klasiko”da esa aynan uning yo‘qligi katta bo‘shliq yaratdi”.
Germaniyalik futbolchiga ko‘ra, “Barselona”ning markaziy himoyasi “Real”ning yuqori pressingiga chiday olmadi va aynan shunda Martinesning o‘rni yaqqol sezildi. “Kataloniyaliklar mana shu bosim ostida juda qiynaldi, chunki himoya orqali chiroyli o‘yin boshlash imkoniyati qolmadi. Inigo Martinesning paslari raqibning pressingini buzishga qodir edi. Hozir esa ular uning o‘rnini bosa oladigan futbolchi topa olishmagan,” — dedi Kroos.
Ma’lumki, Inigo Martines “Barselona” bilan chempionlik mavsumini yakunlagandan so‘ng Saudiya Arabistonining “An-Nasr” klubiga ko‘chib o‘tgan edi. Uning jamoadan ketishi “Barselona”ning himoya chizig‘ida ma’lum darajadagi bo‘shliqni keltirib chiqarganini ko‘plab ekspertlar ham ta’kidlab kelmoqda.
“Real Madrid” esa bu g‘alaba bilan musobaqa jadvalida peshqadamlik mavqeini yanada mustahkamladi. Toni Kroosning so‘zlariga ko‘ra, “El-Klasiko”dagi har bir kichik taktik detal ham natijaga ta’sir qiladi va bu safar “Barselona”ning aynan bir tajribali himoyachiga muhtoj bo‘lgani yaqqol ko‘rindi.
Ko‘plab ispan nashrlari ham Kroos fikriga qo‘shilib, “Barselona”ning himoyadagi noaniq harakatlari jamoaga qarshi ishlaganini yozmoqda. Ehtimol, klub qishki transfer oynasida aynan shu nuqtani mustahkamlashni birinchi vazifa sifatida belgilashi mumkin.
“Zamin”ni Telegramʻda oʻqing!
