La Liga 11-turidan oʻrin olgan uchrashuvda "Vilyarreal" oʻz maydonida "Rayo Valyekano"ni qabul qildi va 4:0 hisobida gʻalaba qozondi. Oʻyinning 22-daqiqasida Jerar Moreno Jorj Mikautadzening uzatmasidan soʻng raqib jarima maydonida toʻpni qabul qilib, himoyachini chalgʻituvchi harakati bilan chetlab oʻtdi va uzoq burchakka aniq zarba yoʻlladi.
Toʻp ustunga tegib darvozaga kirib bordi – 1:0. Ikkinchi boʻlim 57-daqiqasida Alberto Moleyro toʻpni markazdan olib oʻtib, uzoq masofadan darvozaning yaqin burchagiga zarba berdi.
Darvozabon bu zarbaga qarshi hech narsa qila olmadi – 2:0. Oradan koʻp oʻtmay, Nikolas Pepe nozik uzatma bilan Moleyroni jarima maydoniga chiqarib yubordi.
Moleyro zarba berish oʻrniga toʻpni Santi Komesanyaga uzatdi va Santi darvoza chizigʻidan yuqori burchakka zarba berdi – 3:0. 65-daqiqada "Rayo Valyekano" himoyasi yana xato qildi.
Florian Lejon toʻpni yoʻqotib qoʻydi va uni Ayose Peres egallab, himoyachidan qochib, darvozabonni dogʻda qoldirdi – 4:0. "Rayo Valyekano" oʻyinda bir necha imkoniyatga ega boʻldi, ammo darvozabon va ustun ularning zarbalarini qaytarib yubordi.
"Vilyarreal" ushbu gʻalabadan soʻng "Barselona"ni musobaqa jadvalida ikkinchi oʻrindan tushirib, oʻz oʻrniga koʻtarildi. "Rayo Valyekano" esa sakkizinchi oʻrinni boʻlishib turibdi.
