Yevropa transfer bozori yana qiziy boshladi. Bu safar madridliklar diqqat markazida Angliya Premer-ligasidagi yosh iste’dod — Adam Uorton turibdi. “El Nacional”ning yozishicha, “Real” Madrid bosh murabbiyi Xabi Alonso 21 yoshli yarim himoyachini jamoaga kelasi mavsumda qo‘shib olish niyatida.
Alonso Uortonda jamoaning kelajakdagi tayanch ustunini ko‘rmoqda. Uning fikricha, angliyalik futbolchi uslubi va intellektual o‘yin uslubi jihatidan Toni Kroosga juda o‘xshaydi. Shu sababli, ispaniyalik mutaxassis uning transferi bo‘yicha klub rahbariyatiga aniq tavsiya bergan.
Ma’lumotlarga ko‘ra, “Real” “Kristal Pelas”ga 60 million yevro atrofida taklif taqdim etishga tayyor. Madrid klubi uchun bu yosh va istiqbolli futbolchiga nisbatan oddiy narx hisoblanadi. Ispaniyadagi muxlislar ham Alonso tanlovini ijobiy qabul qilmoqda, chunki u transferda deyarli xatolikka yo‘l qo‘ymaydigan murabbiy sifatida tanilgan.
Adam Uorton joriy mavsumda Premer-ligada jamoasi uchun muhim o‘rin tutayapti. U 13 ta uchrashuvda maydonga tushdi va bitta samarali uzatma amalga oshirdi. Ammo uning asosiy kuchli tomoni raqib bosimidagi osoyishta harakatlari va uzoq paslarning aniqligi bo‘lib, aynan shu jihatlar uni “Real” tizimiga moslashtirishni osonlashtiradi.
“Kristal Pelas” klubi hozircha rasmiy izoh bermadi, biroq ular Uortonni sotish uchun juda yuqori narx talab qilishi mumkin. Futbolchining shartnomasi 2029-yil yozigacha amal qiladi, bu esa “Real”ni murakkab muzokaralarga tayyor bo‘lishga majbur etadi.
“Transfermarkt” ma’lumotlariga ko‘ra, Uortonning bozor qiymati aynan 60 million yevroga teng, ya’ni “Real” uni to‘liq baholagan holda olishga tayyor. Agar bu kelishuv amalga oshsa, madridliklar keyingi o‘n yillik uchun yangi yarim himoya ustunini topgan bo‘ladi.
Alonso shogirdlariga xos bo‘lgan sabr, texnik tafakkur va aniq paslar madrid jamoasining kelgusi uslubiga to‘liq mos keladi. Shunday ekan, agar Uorton “Bernabeu”ga yo‘l olsa, u faqat Kroosning vorisi emas, balki yangi bir madrid afsonasining boshlanishiga aylanishi ham mumkin.
“Zamin”ni Telegramʻda oʻqing!
