Liga Superliganing hal qiluvchi — 30-tur bosqichi taqvimini belgilash jarayonida bir nechta muhim omillarni inobatga olgani ma’lum qilindi. Bu haqda Professional futbol ligasi rasman xabar berdi.
Ma’lumotga ko‘ra, so‘nggi turning sanasini aniqlashda qator texnik va tashkiliy jihatlar e’tiborga olingan. Jumladan:
- birinchidan, «Andijon» klubi 26-noyabr kuni xalqaro musobaqada ishtirok etishi munosabati bilan jamoaga qo‘shimcha vaqt talab etiladi;
- ikkinchidan, 30-tur doirasidagi 8 ta bahsdan faqat 4 tasida VAR tizimidan foydalanish imkoni bor;
- uchinchidan, barcha uchrashuvlarni bir vaqtda boshlash holatida ularning to‘liq teletranslyatsiyasini amalga oshirish texnik jihatdan murakkab hisoblanadi.
Liga ma’lum qilishicha, musobaqa oxiriga yaqinlashayotgani sababli, har bir bahs natijasi jadvalga jiddiy ta’sir ko‘rsatishi mumkin. Shu bois, 30-turdagi o‘yinlar sanasi hozircha qisman ochiq qoldirildi. Sababi, ba’zi o‘yinlar natijasi boshqalariga bevosita ta’sir qilishi mumkin va bu holatni oldindan aniqlashning iloji yo‘q.
Amaldagi reglamentga ko‘ra, Liga har bir o‘yin sanasi va joyini kamida 20 kun oldin belgilashi shart. Bu qoida klublar uchun yo‘l chiptalari va mehmonxona bronlarini o‘z vaqtida amalga oshirish imkonini beradi. Shu bois, ayrim jamoalar uchun safar rejasi oldindan belgilanishi muhim sanaladi.
Ma’lum bo‘lishicha, 30-turning asosiy o‘yinlari 30-noyabr, yakshanba kuni o‘tkaziladi. Barcha uchrashuvlar Toshkent vaqti bilan soat 15:00 da start oladi. Shu kuni «Xorazm» o‘z uyida «Neftchi»ni, «Buxoro» esa «Surxon»ni qabul qiladi. Liga mazkur ikki jamoaga safar uchun chiptalarni aynan shu sanaga mos holda xarid qilishni tavsiya etdi.
Qolgan 6 jamoa raqib maydoniga qiyinchiliksiz yetib olish imkoniga ega bo‘lgani uchun, ularning bahslari 30-noyabr kuni qolishi rejalashtirilmoqda. Biroq agar ba’zi uchrashuvlar natijalari boshqalariga ta’sir ko‘rsatmaydigani ma’lum bo‘lsa, u holda shunday bahslar 29-noyabr kuniga ko‘chirilishi mumkin. Bu holda VAR tizimidan foydalanish imkoni va teletranslyatsiya sifati ham oshishi aytilgan.
Liga ma’lumoticha, mavsum yakunida Superliga jadvalida 12, 13, 14 va 15-o‘rinni egallagan klublar pley-off bosqichida ishtirok etadi.
Pley-offning birinchi bosqichi 5-dekabr kuni bo‘lib o‘tadi va unda 12-o‘rindagi klub 15-o‘rindagi, 13-o‘rindagi esa 14-o‘rindagi jamoaga qarshi maydonga tushadi. Misol uchun, hozirgi holatga ko‘ra, «Surxon» — «Xorazm» bilan, «Mash’al» esa «Buxoro» bilan kuch sinashadi.
Ikkinchi bosqich 10-dekabr kuni, hal qiluvchi uchrashuv esa 14-dekabr kuni bo‘lib o‘tadi. E’tiborli jihati, 15-o‘rinda yakunlagan jamoa barcha pley-off bahslarini safarda o‘tkazadi.
Shu tariqa, Liga so‘nggi tur taqvimini belgilashda sport prinsiplariga, VAR imkoniyatlariga va teletranslyatsiya masalalariga bir vaqtda e’tibor bergan holda ish olib boryapti.
“Zamin”ni Telegramʻda oʻqing!
