Qatarda bo‘lib o‘tayotgan VI Islom Birdamligi o‘yinlari doirasidagi ilk turda O‘zbekiston futzal terma jamoasi Saudiya Arabistoniga qarshi maydonga tushdi. Bellashuv juda shiddatli va kurashlarga boy tarzda o‘tdi. O‘yin yakunida terma jamoamiz 5:2 hisobida munosib g‘alaba qozondi.
Birinchi bo‘lim nisbatan teng kurashlar ostida kechdi. Hisobni saudiyalik Abdullah Ali Almachrabi ochdi, ammo jamoamizning javobi uzoq kuttirmadi — Muzaffar Ahadjonov birinchi bo‘lim yakuniga yetmasdan hisobni tenglashtirdi.
Ikkinchi bo‘limda esa ustunlik to‘liq o‘zbek futzalchilari tomonida bo‘ldi. Muhammadali Husanboyev jamoamizni hisobda oldinga olib chiqdi, shundan keyin Akbar Usmonov va Mashrab Adilovning gollari ustunlikni yanada mustahkamladi. Saudiyaliklar Saleh Alqarni orqali bir gol urishga muvaffaq bo‘ldi, ammo o‘yin yakunlanishiga bir daqiqa qolganda Abbos Elmurodov jamoamizning beshinchi to‘pini kiritdi va yakuniy hisobni belgiladi — 5:2.
Bu g‘alaba Islom o‘yinlaridagi start uchun katta ahamiyat kasb etdi. O‘zbekiston terma jamoasi musobaqani faol boshlab, keyingi bosqichlarda ham yuqori natijalar ko‘rsatish niyatida ekanligini namoyon etdi.
Murabbiylar shtabi o‘yindan keyin jamoa harakatidan mamnun ekanini bildirib, keyingi bahslarda himoyadagi ishonchni yanada oshirish va standart vaziyatlardan unumli foydalanish kerakligini ta’kidladi.
Bu g‘alaba bilan O‘zbekiston termasi “A” guruhida yetakchilikni qo‘lga kiritdi va keyingi bahslar oldidan ruhiy ustunlikka ega bo‘ldi.
“Zamin”ni Telegramʻda oʻqing!
