Qatarda o‘tkazilayotgan o‘smirlar o‘rtasidagi jahon chempionatida O‘zbekiston U-17 terma jamoasi musobaqani g‘alaba bilan boshladi. Islom Ismoilov boshchiligidagi yoshlarimiz J guruhi doirasida Paragvay o‘smirlariga qarshi bahs olib borib, 2:1 hisobida zafar qozondilar.
Uchrashuv avvalida raqiblar faol harakat boshlagan bo‘lsa-da, yurtdoshlarimiz tez orada o‘yinni nazoratga oldi. 25-daqiqada Azizbek Abdumo‘minov Abubakir Shukurullayevning yuksak aniqlikdagi uzatmasini samarali yakunlab, hisobni ochdi. Bu gol jamoa uchun ruhiy ustunlikni ta’minladi.
Birinchi bo‘limning so‘nggi lahzasida yana shu futbolchi o‘z mahorat va hushyorligini namoyon etdi — Muhammadali Musaxonovning chiroyli pasidan so‘ng ikkinchi golni kiritib, hisobni 2:0 qildi. Bu gol O‘zbekiston jamoasi uchun muhim burilish nuqtasi bo‘ldi.
Ikkinchi bo‘limda Paragvay futbolchilari hisobni qisqartirishga urindi. Bir necha bor xavfli hujumlar uyushtirishdi, ammo darvozabon Ne’matulloh Rustamjonov ishonchli o‘yini bilan jamoani qutqarib qoldi. Faqatgina bahsning 89-daqiqasida Ledesma penaltidan aniq zarba berib, hisobni qisqartirishga muvaffaq bo‘ldi.
JCH U-17. J guruhi. 1-tur
Paragvay — O‘zbekiston 1:2
5 noyabr. Doha. «Aspire Zone»
Gollar: Ledesma (89) — Azizbek Abdumo‘minov (25, 45+3).
Paragvay — Fernandes, Aranda, Koronel, Kristaldo, Akosta, Almada (Kamps, 46), Franko (Buhring, 46), Ledesma, Villalba, Sanabria (Vera, 59), de Karvalyu (Freyres, 67).
O‘zbekiston — Ne’matulloh Rustamjonov, Muhammadali Musaxonov (Behruz Saidmurodov, 74), Mo‘minxon Bahodirxonov, Muhammad Hakimov, Abdumalik Anvarov (Amirxon Murodov, 85), Azizbek Abdumo‘minov, Azizbek Erimbetov (Qahramon Turg‘unov, 74), Abubakr Shukurullayev, Sadriddin Hasanov (Asilbek Aliyev, 62), Sayfiddin Sodiqov (Jamshid Rustamov, 74), Muhammad Habibullayev.
Ogohlantirishlar: Hakimov (31), Ledesma (31), Hasanov (59), Musaxonov (68), Kamps (71), Aliyev (78), Murodov (88).
O‘zbekiston termasi barcha chiziqlarda intizom bilan harakat qildi. Himoyada Mo‘minxon Bahodirxonov va Muhammad Hakimovning ishonchli o‘yini, yarim himoyada Sayfiddin Sodiqov va Sadriddin Hasanovning faolligi jamoaga ustunlik berdi.
Islom Ismoilov shogirdlari jahon chempionatidagi dastlabki uchrashuvni g‘alaba bilan yakunlab, muxlislarimizni quvonchga to‘ldirdi. Endi ular 8-noyabr kuni Irlandiya o‘smirlariga qarshi muhim bahsga chiqishadi.
“Zamin”ni Telegramʻda oʻqing!
