Yevropa Chempionlar ligasining 4-tur bahslari yakunlangach, UEFA rasmiy sayti musobaqaning haftadagi eng yaxshi futbolchisi bo‘lish uchun asosiy da’vogarlarni ma’lum qildi. Bu safar nomzodlar ro‘yxatida to‘rt nafar futbolchi joy olgan bo‘lib, ularning har biri jamoasi g‘alabasi yoki muvaffaqiyatida hal qiluvchi rol o‘ynagan.
Birinchi nomzod — “Galatasaroy” hujumchisi Viktor Osimhen. Nigeriyalik to‘purar Istanbul klubining “Ayaks”ga qarshi uchrashuvida (3:0) haqiqiy shou namoyish etib, het-trik qayd etdi. Uning tezkor harakatlari va aniq zarbalari raqib darvozaboni uchun hal qiluvchi bo‘ldi.
Ikkinchi nomzod sifatida “Manchester Siti”ning yosh yulduzi Fil Foden ko‘rsatilgan. U Dortmundning “Borussiya”siga qarshi uchrashuvda (4:1) dubl qayd etib, jamoasiga muhim g‘alaba keltirdi. Angliyalik xavbek har bir hujumda faol ishtirok etib, Gvardiola jamoasining asosiy yetakchilaridan biri ekanini yana bir bor isbotladi.
Shuningdek, “Arsenal”ning markaziy yarim himoyachisi Mikel Merino ham haftaning favqulodda nomzodlaridan biri bo‘ldi. Ispaniyalik futbolchi “Slaviya”ga qarshi bellashuvda ikki bor to‘p kiritib, “to‘pchilar”ning ishonchli g‘alabasiga hissa qo‘shdi.
Ro‘yxatni “Bryugge” vingeri Karlush Forbs yakunlaydi. U “Barselona”ga qarshi juda ta’sirli o‘yin ko‘rsatib, dubl qayd etdi va yana bitta golli pasni amalga oshirdi. Uning harakatlari Belgiya klubiga 3:3 hisobida muvozanatni saqlab qolish imkonini berdi.
Endilikda futbol muxlislari UEFA sayti orqali haftaning eng yaxshi o‘yinchisini ovoz berish yo‘li bilan aniqlay oladi. G‘olib ismi yaqin kunlarda e’lon qilinishi kutilmoqda.
Bu safargi nomzodlar — nafaqat gollar, balki maydondagi jonkuyarlik va texnik mahoratning namunasi bo‘lgan futbolchilar sifatida tarixda qolishi aniq.
“Zamin”ni Telegramʻda oʻqing!
