Portugaliyalik futbol yulduzi Krishtianu Ronaldu yaqinda jurnalist Pirs Morgan bilan bo‘lgan suhbatida o‘zi haqidagi fikrlarni ochiq bayon qildi. Afsonaning ta’kidlashicha, u nafaqat sport olamida, balki butun dunyodagi eng mashhur shaxslardan biri, hatto AQSH prezidenti Donald Trampdan ham mashhurroq, deb hisoblaydi.
Suhbat davomida jurnalist Ronaldu bilan qiziqarli mavzuda bahs boshladi:
— Siz ikkovingiz — sayyora miqyosidagi eng taniqli insonlar. Senda eng ko‘p obunachilar, u esa dunyo siyosatining markazidagi shaxs. Seningcha, kim mashhurroq — senmi yoki Donald Tramp?
Ronaldu tabassum bilan javob berdi:
— Agar global miqyosda gapiradigan bo‘lsak, men undan mashhurroqman. Hatto dunyo xaritasidagi kichik orollarda ham odamlar meni taniydi, — dedi u ishonch bilan.
Pirs Morgan futbolchining javobini qiziqish bilan qabul qildi va shunday dedi:
— Demak, sen o‘zingni Trampdan ham ko‘ra mashhur deb hisoblaysanmi?
— Albatta, — deb javob qaytardi Ronaldu. — Menimcha, dunyoda mendan mashhurroq inson yo‘q.
Ronalduning bu so‘zlari ijtimoiy tarmoqlarda keng muhokamalarga sabab bo‘ldi. Ko‘pchilik uning ishonchini yuqori baholagan bo‘lsa, ba’zilar bu fikrni ortiqcha kibr deb qabul qildi. Biroq barcha tan oladi — Krishtianu Ronaldu futbol tarixida o‘z izini qoldirgan, uning nomi sport chegaralaridan chiqib, dunyo madaniyatining bir qismiga aylangan.
“An-Nasr” klubi hamda Portugaliya milliy jamoasi safida hozir ham yuqori darajada o‘ynayotgan Ronalduning ijtimoiy tarmoqlardagi muxlislar soni 600 milliondan ortiq. Bu ko‘rsatkich bilan u Instagram va Facebook’dagi eng ko‘p kuzatiluvchi sportchi sifatida rekord o‘rnatgan.
Pirs Morgan bilan suhbatda u shuningdek, Tramp bilan shaxsan uchrashishni xohlashini, chunki u ham “yaxshi energiyaga ega inson” ekanini aytdi. “Men dunyodagi turli yetakchilar, sportchilar va yulduzlar bilan suhbatda bo‘lganman. Biroq men uchun asosiy narsa — insonning ichki energiyasi. Agar u ijobiy bo‘lsa, uning quvvati butun dunyoga tarqaladi”, — dedi Ronaldu.
Uning bu gaplari yana bir bor uning o‘ziga ishonchini va tabiiy xarizmasini namoyon qildi. Ronalduning so‘zlari ko‘pchilikning esidan chiqmaydigan darajada yangradi:
“Menimcha, dunyoda mendan ko‘ra mashhurroq odam yo‘q.”
Shubhasiz, futbol tarixi bu darajadagi ishonch va mashhurlikni kamdan kam sportchida ko‘rgan.
“Zamin”ni Telegramʻda oʻqing!
