UEFAdan rad javobi: "Kristal Pelas" muammosi

"Kristal Pelas" jamoasining dekabr oyidagi jadvali juda tigʻiz: 18-dekabr kuni Konferensiyalar ligasi doirasida "KuPS"ga qarshi oʻyin, 21-dekabr kuni Premyer-ligada "Lids"ga qarshi bahs va 23-dekabrda Liga kubogi uchrashuvida "Arsenal"ga qarshi oʻyin rejalashtirilgan. "Kristal Pelas" va "Arsenal" klublari Angliya Premyer-ligasiga murojaat qilib, mos ravishda "Lids" va "Everton"ga qarshi oʻyinlarini 21-dekabrdan 20-dekabrga koʻchirishni soʻrashgan.

Shu bilan birga, "Kristal Pelas" UEFAga 18-dekabr kuni boʻlib oʻtadigan "KuPS"ga qarshi oʻyinni 17-dekabrga koʻchirish taklifi bilan murojaat qilgan. Biroq, Mirror nashrining xabariga koʻra, UEFA "Kristal Pelas"ning soʻrovini rad etdi, chunki Konferensiyalar ligasining guruh bosqichidagi soʻnggi tur oʻyinlari bir vaqtning oʻzida oʻtkazilishi shart.

Shu bilan birga, Angliya futbol ligasi manbalari Rojdestvo bayrami eʼtiborga olinib, 23-dekabrga belgilangan "Arsenal" va "Kristal Pelas" oʻrtasidagi Liga kubogi oʻyinini oldinga surish ehtimoli kamligini bildirmoqda. “Zamin”ni Telegramʻda oʻqing!