«Manchester Siti»ning norvegiyalik hujumchisi Erling Holand Angliya Premer-ligasining 11-turida «Liverpul»ga qarshi bo‘ladigan markaziy bahs oldidan o‘z fikrlarini bildirib o‘tdi. Uning ta’kidlashicha, shaxsiy rekordlar yoki statistika uni qiziqtirmaydi – u faqat jamoa g‘alabasi uchun o‘ynaydi.
«Nega men ehtimoliy rekordlar haqida o‘ylashim kerak? Bu narsalar haqida o‘ylasang, diqqating bo‘linib ketadi. Mening asosiy vazifam – jamoamga uch ochko olishda yordam berish. Hujumchi sifatida gol urishga harakat qilaman, ammo shundan ham muhimi – jamoaviy g‘alabalar. Natija hamisha birinchi o‘rinda bo‘lishi kerak», — dedi Xoland Sky Sports nashriga bergan intervyusida.
Uning so‘zlariga ko‘ra, futbolda rekordlar haqida emas, jamoa maqsadi haqida o‘ylash muvaffaqiyat garovidir:
«Albatta, agar g‘alabalar orqali rekordlar ham kelsa, bu yomon emas. Lekin men uchun bu ikkinchi darajali. Agar sen faqat shaxsiy natijalarni o‘ylasang, bu jamoaga foyda bermaydi. Bunday yondashuv yaxshi natijaga olib kelmaydi. Asosiysi – mehnat qilish va har bir bahsda g‘alaba uchun jon berish».
Ma’lumot uchun, Erling Holand joriy mavsumda barcha musobaqalarda 14 ta uchrashuvda ishtirok etib, 18 ta gol urgan va 1 ta golli pas uzatgan. Uning samaradorligi hozircha Yevropadagi eng yuqori ko‘rsatkichlardan biri hisoblanadi.
Muxlislar fikricha, Holandning bu so‘zlari uning nafaqat maydonda, balki ruhiy jihatdan ham yetuk futbolchiga aylanganini ko‘rsatadi. Chunki u g‘alaba ruhini shaxsiy maqsadlardan ustun qo‘yadi — bu esa jamoani chempionlikka yetaklaydigan asosiy omildir.
“Zamin”ni Telegramʻda oʻqing!
