Superliganing 28-turida bo‘lib o‘tgan “Bunyodkor” – “Dinamo” (1:3) bahsi nafaqat maydonda, balki undan tashqarida ham katta qiziqish uyg‘otdi. Bellashuvdan so‘ng Samarqand klubi bosh murabbiyi Vadim Abramov matbuot anjumanida ishtirok etib, o‘yin haqidagi fikrlarini bildirdi.
“Uchrashuv qanday kechganini hamma ko‘rdi. “Bunyodkor” yaxshi jamoa, buni hamisha tan olaman. Samarqanddagi ilk o‘yinimizda ular bizga birinchi mag‘lubiyatni yetkazgandi. Shu sabab bu bahsda yigitlarni alohida ruhlantirishning hojati yo‘q edi — ularning o‘zida g‘alabaga bo‘lgan ishtiyoq baland edi. Jamoamga minnatdorchilik bildiraman, barchamiz uchun bu o‘yin juda muhim edi. O‘ylaymanki, muxlislar ham bahsdan zavq olishdi”, — dedi murabbiy.
Abramov ta’kidlashicha, bu natija nafaqat jamoa uchun revansh bo‘ldi, balki chempionatdagi kurashda muhim burilish nuqtasi ham hisoblanadi.
“To‘g‘risi, men sanalar yoki tarixiy raqamlarga ko‘p e’tibor bermayman. Biz uchun asosiy maqsad — har bir bahsda g‘alaba qozonish. Birinchi davra mag‘lubiyati bizga og‘ir ta’sir qilgandi. Bugun esa o‘sha alamni chiqardik. “Bunyodkor” bizga yaqinlashmasligi uchun g‘alaba shart edi. Yana uchta o‘yinimiz qoldi, endi butun diqqatni ularga qaratamiz”, — dedi u.
Murabbiy “Dinamo”ning bu safar uzoq masofadan ko‘p zarbalar berganini ham izohladi:
“Futbolda hammasi raqibga bog‘liq. Agar raqib jamoaviy himoyalansa, u holda maydon markazini yorib kirish qiyin bo‘ladi. Shuning uchun biz uzoq masofadan ko‘proq zarbalar berishga majbur bo‘ldik. Bu rejaga kirgan narsa emas, balki o‘yindagi sharoitning o‘zi shunday bo‘ldi.”
Abramov yosh futbolchilarning harakatidan ham mamnunligini bildirdi:
“Yoshlarimiz yaxshi o‘ynadi. Masalan, O‘rmonjonovni ko‘pincha chap oyoq bilan himoyaga tortishdi, u bundan keyin ham bunday bosim ostida o‘ynashni o‘rganishi kerak. Unda katta potensial bor.”
Murabbiydan ba’zi futbolchilar shartnomasi tugayotgani haqida so‘raldi:
“Bu haqiqat, ko‘pchiligining shartnomasi yakunlanmoqda. Ularga qiziqish bormi-yo‘qmi, hozir aniq ayta olmayman. Chempionat tugagach, hammasi ma’lum bo‘ladi. Futbolchi qayerda sharoit yaxshi bo‘lsa, o‘sha yerga intiladi — bu tabiiy hol.”
Jarohatlar masalasi haqida so‘z yuritar ekan, Abramov maydon sharoitiga e’tibor qaratdi:
“Biz ko‘pincha qattiq maydonda mashg‘ulot o‘tkazamiz, o‘yin kuni esa yumshoq gazonga chiqamiz. Bu futbolchilarning jismoniy tayyorgarligiga ta’sir qiladi. Mashg‘ulotda rezina butsi kiyamiz, o‘yinda esa tishli butsilar talab etiladi. Bu organizmga katta yuk bo‘ladi va jarohat xavfini oshiradi.”
Abramovning so‘zlariga ko‘ra, “Dinamo” jamoasi hozir yuqori kayfiyatda va har bir bahsni g‘alaba uchun o‘tkazish niyatida. “Paxtakor”ning ochko yo‘qotishi esa samarqandliklarga yangi imkoniyat eshigini ochdi.
Shu tariqa, “Dinamo” nafaqat “Bunyodkor” ustidan muhim g‘alaba qozondi, balki chempionlik poygasida yanada faol ishtirok etish uchun kuchli psixologik ruhiyatni ham qayta tikladi.
“Zamin”ni Telegramʻda oʻqing!
