Qatardagi jahon chempionatida muvaffaqiyatli ishtirok etayotgan O‘zbekiston U-17 terma jamoasi bosh murabbiyi Islombek Ismoilov Tribuna.uz muxbiri bilan suhbatda Panamaga qarshi bahs, guruh bosqichi va pley-off oldidan kutilmalar haqida to‘xtalib o‘tdi.
Ismoilovning aytishicha, Panamaga qarshi o‘yin og‘ir bo‘lishini oldindan his etishgan:
“Biz raqib bor kuchini ishga solishini bilardik, chunki bu guruhning oxirgi bahsi edi. Birinchi bo‘limda katta bosim ostida o‘ynadik, shu bois to‘liq nazoratni yo‘qotdik. Ammo tanaffusda jamoa ruhiy jihatdan qayta to‘plandi va ikkinchi bo‘limda o‘z o‘yinimizni namoyish etdik. Natijada yirik hisobda g‘alaba qozondik.”
Uning ta’kidlashicha, har bir o‘yin juda og‘ir kechgan, chunki barcha jamoalarda imkoniyatlar teng bo‘lgan:
“Guruhimiz ancha murakkab edi. Har bir bahsda katta kuch sarfladik. Yigitlar yuksak mehnat qildi va har gal maydonda barchasini berdi. Hech bir raqibga qarshi o‘yin oson bo‘lmadi.”
Ismoilov pley-off bosqichiga tayyorgarlik haqida ham fikr bildirdi:
“Endi eng muhimi — tiklanish. Xorvatiya bizdan ikki kun oldin o‘ynagani sabab, ularda tayyorgarlik uchun vaqt ko‘proq bo‘ladi. Ammo buni bahona qilmaymiz. Biz faqat g‘alaba haqida o‘ylaymiz. Xudo xohlasa, Xorvatiyani yengib, xalqimiz yuzini yanada yoritamiz.”
Ma’lumot uchun, O‘zbekiston — Xorvatiya o‘yini 15-noyabr kuni soat 20:45 da “Aspire” akademiyasi maydonida bo‘lib o‘tadi.
Bu suhbatdan ko‘rinib turibdiki, Islombek Ismoilov shogirdlariga ishonadi va ularda pley-off bosqichida ham g‘alaba ruhi yuqori. Murabbiyning so‘zlaridan jamoada birdamlik, ruhiy barqarorlik va ishonch ustuvor ekanini anglash qiyin emas.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
