«Al Ain Cup» musobaqasida bugun yana bir tarixiy bellashuv qayd etildi. O‘zbekiston milliy jamoasi Misr kabi tajribali va yuqori darajadagi raqibga qarshi maydonga tushib, munosib o‘yin orqali ishonchli g‘alabaga erishdi. Italyan mutaxassisi Fabio Kannavaro shogirdlari bu muvaffaqiyat bilan nafaqat finalga yo‘llanma oldi, balki Misr termasi uchun ancha vaqt davom etgan mag‘lubiyatsiz seriyaga nuqta qo‘ydi.
Ma’lumki, Hossam Hasan boshchiligidagi Misr milliy jamoasi oxirgi 8 oy mobaynida birorta o‘yinni yo‘qotmagan edi. Ularning so‘nggi mag‘lubiyati 27-mart kuni Xorvatiyaga qarshi o‘tkazilgan o‘rtoqlik uchrashuvida (2:4) qayd etilgan. Shundan keyingi 14 ta bellashuv davomida Saloh yetakchiligidagi terma 10 marta g‘alaba qozongan, faqat 4 marta durang qayd etgandi.
Biroq bugun barchasi o‘zgardi. O‘zbekiston milliy jamoasi jang maydonida o‘zining jismoniy tayyorligi, taktik intizomi va irodasi bilan ajralib tura oldi. Ayniqsa, o‘yin boshidayoq bosimni oshirgan termamiz raqibni qiyin ahvolga soldi va muhim gollar orqali hisobda oldinga chiqdi. Misrning tajribasi, kuchli tarkibi va yirik turnirlar tajribasiga qaramay, ular bu safar o‘yinni o‘z foydalariga o‘zgartirishga qodir bo‘lishmadi.
Albatta, Misrning bu mag‘lubiyati ularning yil davomidagi barqaror o‘yinini inkor etmaydi. Ular Jahon chempionati–2026 musobaqasiga munosib ravishda yo‘llama olgan va Afrika qit’asining yetakchi jamoalari qatorida hisoblanadi. Ammo bugun barcha diqqat O‘zbekistonga qaratildi — jamoa o‘z so‘zini ayta olishini yana bir bor namoyish etdi.
Endi Kannavaro shogirdlari finalda Eronga qarshi bahs olib boradi. Misr esa 3-o‘rin uchun Kabo-Verdega qarshi kuch sinashadi.
O‘zbekistonning bu g‘alabasi muxlislarga yangi umid, jamoaga esa yangi ishonch bag‘ishladi. Ishonamizki, bu g‘alabadan keyin milliy jamoamiz yanada yuqori marralarni ko‘zlaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
