Samarqandning «Dinamo» klubi bosh murabbiyi Vadim Abramov «Qo‘qon-1912»ga qarshi 0:0 hisobi bilan yakunlangan uchrashuvdan keyingi matbuot anjumanida vaziyatni batafsil izohladi. Murabbiy o‘z so‘zlarida jamoa mavsumdagi so‘nggi uy o‘yinida muxlislar kutgan g‘alabani taqdim eta olmagani uchun qattiq afsusdaligini bildirdi.
Abramovga ko‘ra, bugungi uchrashuv oldidan muammolar kutilgan, ammo ular bunchalik ko‘p bo‘lishini hech kim tasavvur qilmagan. Raqib juda zich va tizimli himoyalangani bois, «Dinamo» zarur bo‘lgan golni topa olmadi. Hujumda tezkor qaror qabul qilish yetishmadi, ba’zan esa sovuqqonlik o‘rnini shoshqaloqlik egallab qo‘ydi.
Jarohatlar va diskvalifikatsiya — asosiy dard
Bosh murabbiy jamoadagi kadr muammolarini ham yashirmadi. Pletnyov diskvalifikatsiya sabab o‘yinga chiqmadi.
Ratinio va Firdavs Abdurahmonov esa mashg‘ulotda bir-biri bilan to‘qnashib, tizza qismini jiddiy jarohatlab olgan.
Abramovning ta’kidlashicha, zaxiradan maydonga tushgan futbolchilar ham o‘yin ritmini oshira olmagan. Taassufki, buning barchasi jamoa o‘yinining umumiy sifatiga ta’sir qilgan.
Shu bilan birga, Hojimirzayevning safga qaytgani ijobiy yangilik bo‘ldi. Biroq bugun raqib darvozasiga gol urilganida, vaziyat tomomila boshqacha ko‘ringan bo‘lardi.
Hakam faoliyati bo‘yicha keskin fikrlar
Abramov hakamlar faoliyati haqida ham tanqidiy fikr bildirdi. Uning aytishicha, o‘yin paytida raqib jamoa vaqtni cho‘zishga urinishni ko‘p qo‘llagan, ammo hakamlar bu holatlarga yetarli reaksiya ko‘rsatmagan.
— «Bunday o‘yinda atigi 6 daqiqa asosiy vaqtga qo‘shish? Bu hayron qolarli. O‘zgarishlar 10 marta bo‘ldimi? Vaqt cho‘zilishichi? Hammasi uchun bor-yo‘g‘i 6 daqiqa… Qiziq», — dedi murabbiy.
Medallar uchun imkoniyat qanday?
Murabbiyning aytishicha, «Dinamo» hali ham medallar uchun kurashda. Bronza medali jamoaning o‘z qo‘lida, ammo kumush — endi faqat ularga bog‘liq emas.
— «Hammasi o‘z qo‘limizda edi. Chempionlik uchun ham kurashda edik. Shunga qaramay, oxirigacha maydonda bor kuch bilan harakat qilamiz», — dedi Abramov.
Ratinioning holati tashvishli
Murabbiy Ratinioning jarohati jiddiy ekanini tan oldi. Uning «Nasaf»ga qarshi o‘yinda maydonga tushishi amalda mumkin emas. Operatsiya kerakmi-yo‘qmi — buni vaqt ko‘rsatadi.
Kelasi hal qiluvchi bellashuv
Hozirgi kunda «Dinamo» 57 ochko bilan 4-o‘rinda, «Nasaf» esa 58 ochko bilan 3-pog‘onada bormoqda. Jamoalar 29-noyabr kuni Qarshida o‘ta muhim uchrashuvda to‘qnash keladi. Ushbu bellashuv har ikki tomon uchun mavsum taqdirini belgilashi mumkin.
Samarqand jamoasi oldida endi faqat bitta vazifa bor: qolgan barcha imkoniyatlardan maksimal darajada foydalanish va oxirigacha kurashish.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
