Superligada 2025 yilgi mavsum o‘z yakuniga yaqinlashar ekan, mamlakat futbol jamoatchiligi yana bir bor eng munosib nomzodlarni tanlash bosqichiga kirdi. Mavsum davomida o‘yin sifati, individual mahorat, taktik o‘sish va intizom bo‘yicha yaqqol ajralib turgan futbolchi va murabbiylar uchun an’anaviy mukofotlar taqdim etiladi.
Liga bu yil ham yangi ruhda, yuqori daraja va shaffoflik asosida o‘tgan chempionatning eng munosib ishtirokchilarini e’lon qilishga tayyorlanmoqda. Bu jarayon nafaqat klublar, balki barcha muxlislar uchun ham qiziq, chunki har bir nominatsiya ortida butun mavsumning mehnati, qiyin pallalar va muhim burilish lahzalari yotadi.
Bu yil quyidagi 9 nominatsiya bo‘yicha g‘oliblar aniqlanadi:
- Yil futbolchisi – butun mavsum davomida eng barqaror va ta’sirli o‘yin ko‘rsatgan futbolchi.
- Yil murabbiyi – jamoasi natijalarini sezilarli darajada yaxshilagan, taktik g‘alabalar va o‘sishga erishgan murabbiy.
- Yil javohiri – yosh, iqtidorli va “kelajiyot yulduzi” deb baholanayotgan futbolchi.
- Yil kashfiyoti – yil davomida kutilmaganda o‘zini namoyon qilgan yangi yulduz.
- Yil goli – estetika, qiyinlik darajasi va ahamiyati jihatidan eng ta’sirli gol.
- Yil legioneri – chempionatda o‘ynayotgan xorijliklar ichida eng yuqori darajada harakat qilgan futbolchi.
- Yil stadioni – infratuzilma, muxlislarga qulaylik va atmosferasi bilan ajralib turgan arena.
- Yil hakami – adolatli va barqaror ishlagan, og‘ir qarorlarni bekam-u-ko‘st qabul qilgan hakam.
- Fair Play – intizom, hurmat va sport axloqiga amal qilgan jamoa yoki futbolchi.
Bu yilgi mukofotlar orasida yana bir muhim yangilik – Liga tarixida ilk bor Yoshlar ramziy terma jamoasi tuziladi. Mazkur jamoa mavsum davomida o‘zining jonkuyar o‘yini, g‘ayratli harakatlari va superligaga tez moslasha olgan yosh futbolchilardan shakllantiriladi. Uning joriy etilishi mahalliy futboldagi yangi avlodga bo‘lgan e’tibor va ishonchning yana bir isbotidir.
Mavsum yakunlanmoqda, ammo baholar, taassurotlar va qarorlar endi boshlanyapti. Kim “yil futbolchisi” bo‘ladi? Qaysi murabbiy tajriba va mahoratini isbotlaydi? Qaysi yosh yulduz barcha e’tiborni o‘ziga qaratib, kelajakda terma jamoa uchun asosiy nomzodga aylanadi?
Bu savollarga javoblar yaqin kunlarda ma’lum bo‘ladi. Bir narsa aniq: 2025 yilgi mavsum o‘z dramatizmi, raqobati va talantini namoyon qilgan futbolchilar bilan tarixda qoladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
