Kataloniya grandi yozgi transferlar davrini jiddiy o‘zgarishlar bilan boshlash niyatida. Klub rahbariyati himoya va hujum chizig‘ini Bundesligada tajribali, yuqori darajadagi o‘yin ko‘rsatayotgan futbolchilar bilan kuchaytirish rejasini yo‘lga qo‘ygan. Mundo Deportivo nashrining yozishicha, jamoa aynan Germaniya chempionatida porlayotgan to‘rt nafar futbolchiga jiddiy qiziqish bildirmoqda.
Ma’lumotlarga qaraganda, “Barselona” himoya chizig‘ini ikki yirik nom bilan mustahkamlashni ko‘zlamoqda. Ularning ilk maqsadi — “Bavariya” va Fransiya termasining kuchli markaziy himoyachisi Dayo Upamekano. Uning Myunxen klubi bilan amaldagi shartnomasi 30-iyunda yakunlanadi, bu esa kataloniyaliklarga uni bepul olib kelish imkonini beradi. Hamyon uchun yengil, himoya uchun kuchli variant — klub bunday imkoniyatni qo‘ldan chiqarmoqchi emas.
Ikkinchi nomzod esa “Borussiya Dortmund”ning ajoyib darajada o‘sishda davom etayotgan 25 yoshli himoyachisi Niko Shlotterbek. Uning o‘yini, texnik mahorati, pozitsion fikrlashi “Barselona”ning talablari bilan to‘liq mos keladi. Dortmundlik futbolchining bahosi taxminan 40 million yevro atrofida bo‘lishi aytilmoqda. Kataloniya klubi bu mablag‘ni tejash uchun variantlar qidirmoqda, ammo qiziqish juda jiddiy.
Himoyadagi rejalar bilan cheklanmagan holda, klub hujum chizig‘ini ham qayta qurish niyatida. Xans-Diter Flikning rejalariga ko‘ra, jamoada gol urish mas’uliyatini zimmasiga oladigan, o‘yin intilishini oshiradigan yangi to‘purarlar kerak. Shu bois “Bavariya” superhujumchisi Harri Keyn va “Borussiya Dortmund” forvardi Seru Girassi klubning transfer ro‘yxatiga kiritilgan.
Keyn — tajribali, ishonchli, goliga kafolati bor hujumchi. Girassi esa so‘nggi mavsumlarda Bundesligada yuqori sur’atda o‘sib, eng ko‘p gol uruvchi futbolchilardan biriga aylandi. Ikkisi birgalikda jamoaning oldingi chizig‘ini tubdan o‘zgartirishi mumkin. Bir nechta manbalar ta’kidlashicha, har ikki o‘yinchini olib kelish uchun kamida 65 million yevro talab etiladi, bu esa “Barsa” uchun jiddiy, biroq hozirgi sharoitda o‘rinli investitsiya hisoblanadi.
Klub atrofidagi manbalar aytishicha, Flikning asosiy maqsadi — jamoani qayta qurish, taktik jihatdan yanada universal va iste’dodlarga boy tarkib tuzish. Germaniya chempionatida ulkan tajriba orttirgan futbolchilarning kelishini aynan shu strategiyaning bir qismi sifatida ko‘rish mumkin.
Kataloniyada transfer rejalari tobora qiziyapti, ishqibozlar esa ochiqcha kutmoqda: agar ushbu to‘rtlikdan kamida uchtasi kelsa ham, “Barselona” yangi mavsumni mutlaqo boshqacha ruhiyat bilan boshlashi turgan gap.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
