O‘zPFL matbuot xizmati tomonidan «Yil futbolchisi» nominatsiyasi uchun yangilangan nomzodlar ro‘yxati e’lon qilindi. Yangilangan saralashda Xurshid G‘iyosov, Oybek Bozorov va Ikrom Aliboyevning nomzodligi olib tashlangani ma’lum qilindi. Bu bilan mavsumning eng nufuzli individual mukofoti uchun asosiy beshlik rasman shakllandi.
Joriy mavsumda o‘z jamoalarida yetakchi samaradorlikni namoyon etgan, statistik ko‘rsatkichlari bilan porlagan futbolchilar quyidagicha beshtalikka kirdi:
Abrorbek Ismoilov (29 o‘yin, 4 gol, 5 assist, 2297 daqiqa)
Maydondagi barqaror o‘yini, markazdagi tinimsiz harakatlari va aniq paslari bilan jamoasi uchun hal qiluvchi pog‘onaga aylangan xavfli yarim himoyachi.
Igor Sergeev (29 o‘yin, 20 gol, 2 assist, 2327 daqiqa)
Superliganing eng kuchli bombardirlaridan biri. Uning gollari bir nechta o‘yin taqdirini o‘zgartirdi va jamoasiga muhim ochkolar keltirdi.
Jamshid Iskanderov (29 o‘yin, 7 gol, 10 assist, 2289 daqiqa)
Soz rejissyor, o‘yinni boshqarishdagi ustalik, yuqori aniqlikdagi paslar va hujumlar tashkil etishdagi mahorat uni nomzodlar qatoriga kiritdi.
Lyupcho Doriyev (29 o‘yin, 16 gol, 9 assist, 2561 daqiqa)
Yilning eng barqaror va ta’sirli qanot hujumchilaridan. Uning tezligi, driblingi va samaradorligi jamoasi hujumida asosiy qurol bo‘ldi.
Hojiakbar Alijonov (25 o‘yin, 2 gol, 7 assist, 1983 daqiqa)
Ko‘pqirralilik, foydali harakatlar, soz krosslar va eng muhimi — barqaror optimal forma. U jamoa o‘yinlaridagi universal hal qiluvchi bo‘g‘inga aylangan.
Mehmon guruhidagi foydalanuvchilar ushbu nashrga izoh qoldira olmaydi.
