«Real Madrid» bu hafta muhim sinov oldidan yana bir qator yo‘qotishlar bilan to‘qnash keldi. Jamoa himoyachisi Raul Asensio virusli infeksiya tufayli «Jirona»ga qarshi uchrashuvda maydonga tushmasligi deyarli aniq bo‘lib turibdi. Bu esa Xabi Alonsoning tarkibiy rejalariga jiddiy ta’sir ko‘rsatishi mumkin.
Kechagi mashg‘ulotlarda jamoaning yana bir nechta yetakchi futbolchilari ham qatnashmadi. David Alaba, Dani Karvaxal va yosh himoyachi Din Heysen umumiy dasturda ko‘rinmadi — bu esa ularning holati hali kutilgan darajada emasligini anglatadi.
Shu bilan birga, muxlislar uchun yaxshi yangilik ham bor: Eder Militao jarohatdan keyin maydonga qaytdi va oxirgi ikki mashg‘ulotda jamoa bilan cheklangan rejimda bo‘lsa-da, harakat qildi. Agar barcha ko‘rsatkichlar ijobiy bo‘lsa, u qaydnomadan o‘rin olishi mumkin.
Xabi Alonso Chempionlar Ligasidagi «Olimpiakos»ga qarshi dramatik o‘yinni kasallik sabab o‘tkazib yuborgan Tibo Kurtuaga ham ishona oladi. Belgiyalik posbonning holati yaxshilangan va u «Jirona»ga qarshi bahsda jamoaga yordam berishi kutilmoqda.
Bundan tashqari, Antonio Ryudiger va yosh yarimhimoyachi Franko Mastantuono ham qaydnomaga kiritilishi mumkin. Ammo ularning o‘yinda to‘liq qatnashishi hali noma’lum. Chunki jarohatdan tiklanishganiga qaramay, ular jamoa bilan jami bir necha mashg‘ulotdagina to‘liq qatnashishga ulgurdi.
«Real» oldinda turgan muhim bahs arafasida tarkib jihatidan jiddiy sinovdan o‘tmoqda. Endi Xabi Alonso qanday qaror qabul qilishi va qaysi futbolchilarni asosiy tarkibda maydonga tushirishi muxlislar uchun asosiy intriga bo‘lib turibdi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
