Bugun futbol olamida eng kutilgan voqealaridan biri — 2026 yilgi Jahon chempionati guruh bosqichiga qur’a tashlash marosimi bo‘lib o‘tadi. Va albatta, ushbu jarayon millionlab o‘zbek muxlislari uchun alohida ahamiyatga ega, chunki tarixda birinchi bor O‘zbekiston milliy terma jamoasi Jahon chempionatida ishtirok etadi.
Qur’a marosimi AQSH poytaxti Vashingtonda joylashgan «The Kennedy Center» majmuasida tashkil etiladi. Tadbir Toshkent vaqti bilan soat 22:00 da start oladi. Ushbu nufuzli tadbirda O‘FA rahbariyati, bosh murabbiy Fabio Kannavaro, murabbiylar shtabi va FIFAning maxsus taklifi bilan o‘zbek futboli afsonasi Mirjalol Qosimov ishtirok etmoqda.
Savatchalar taqsimoti e’lon qilindi — O‘zbekiston 3-savatda
Rasman e’lon qilingan savatlar tuzilishiga ko‘ra, O‘zbekiston 3-savatdan o‘rin oldi. Bu esa biz birinchi savatdan super-top jamoalardan biri, ikkinchi savatdan kuchli termalardan biri va to‘rtinchi savatdan murakkab raqiblarga duch kelishimiz mumkinligini anglatadi.
1-savatdagi yetakchilar:
Kanada, Meksika, AQSH — mezbonlar
Ispaniya, Argentina, Fransiya, Angliya, Braziliya, Portugaliya, Germaniya, Niderlandiya, Belgiya
2-savatdagi raqiblar:
Xorvatiya, Marokash, Kolumbiya, Urugvay, Shveysariya, Yaponiya, Senegal, Eron, Janubiy Koreya, Ekvador, Avstriya, Avstraliya
3-savat (O‘zbekistonning savati):
Norvegiya, Panama, Misr, Aljir, Shotlandiya, Paragvay, Tunis, Qot-d’Ivuar, O‘zbekiston, Qatar, Saudiya Arabistoni, Janubiy Afrika
4-savat:
Iordaniya, Kabo-Verde, Gana, Kyurasao, Gaiti, Yangi Zelandiya va pley-off g‘oliblari.
O‘zbekiston kimlarga tushishi mumkin?
Gipotetik guruh variantlarini tasavvur qilsak:
Eng qiyin guruh variantlaridan biri:
• Braziliya
• Xorvatiya
• O‘zbekiston
• Gana
Eng maqbul (qog‘ozda yengil) variantlardan biri:
• Kanada
• Avstraliya
• O‘zbekiston
• Yangi Zelandiya
Albatta, Jahon chempionatida "yengil raqib" degan tushuncha yo‘q. Lekin qudratli Ispaniya, Argentina yoki Fransiya kabi jamolar tushishi ehtimoli borligi sabab, muxlislar barchasini qiziqish bilan kutmoqda.
O‘zbekiston delegatsiyasi AQSHda — tarixiy marosim oldidan baland kayfiyat
Ishtirokchilar orasida Mirjalol Qosimovning bo‘lishi muxlislar uchun alohida ramziy ahamiyatga ega. Uning avlodidan termamiz ilk bor mundialga yo‘l olgani hayrat va g‘ururni yanada oshirdi. Qolaversa, Kannavaro va uning shtabi qur’adan katta umid bilan kutmoqda.
Qur’a qanday o‘tadi?
Har bir guruh 4 ta savatdan bittadan raqibni qabul qiladi. Bir qit’adan 2 jamoa tushmaslik qoidasi ham saqlanadi (Yevropadan ikkita bo‘lishi mumkin).
E’tibor markazidagi savol: Bizga kim tushadi?
Ha, futbol dunyosi bugun aynan shu savol atrofida jonlanmoqda. O‘zbekistonda esa millionlab muxlislar soat 22:00 ni intizorlik bilan kutib turibdi.
Siz bu haqda nima deysiz? Qaysi jamoalar bizga «omadli» raqib bo‘lishi mumkin?
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
