Yevropa futbol transfer bozorida yana bir yirik yangilik paydo bo‘ldi. Germaniyaning «Bavariya» klubi markaziy himoyachisi Dayo Upamekano faoliyatini Madridning «Real» jamoasida davom ettirishga juda yaqin turibdi. Footmercato nashri tarqatgan ma’lumotlarga ko‘ra, tomonlar o‘rtasida og‘zaki kelishuvga erishilgan.
Xabarda aytilishicha, «qirollik klubi» fransiyalik futbolchining vakillari bilan muzokara olib borib, shartnoma bo‘yicha barcha talablarni qabul qilishga tayyor ekanini bildirgan. Bu esa madridliklar Upamekanoni kelajakda jamoa himoya chizig‘ining asosiy ustunlaridan biri sifatida ko‘rayotganini anglatadi.
27 yoshli himoyachining «Bavariya» bilan amaldagi shartnomasi kelasi yozda yakunlanadi. Shu sababli u erkin agent maqomini olishi mumkin. Biroq myunxenliklar ham bunga befarq emas: klub rahbariyati hali-hanuz Upamekanoni bitimni uzaytirishga ko‘ndirish ustida ish olib bormoqda.
Joriy mavsumda Dayo Upamekano barcha turnirlarda «Bavariya» safida 20 ta uchrashuvda ishtirok etib, 1 marta raqib darvozasini ishg‘ol qildi. Uning barqaror o‘yini va jismoniy salohiyati Yevropaning yetakchi klublari e’tiborini tortayotgani bejiz emas. Transfermarkt portali ma’lumotlariga ko‘ra, himoyachining bozor qiymati 60 million yevro atrofida baholanmoqda.
Agar ushbu transfer amalga oshsa, «Real» himoya chizig‘ida yangi davr boshlanishi mumkin. Muxlislar esa bu kelishuv rasmiy tasdiqlanishini intiqlik bilan kutmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
