Saudiya Arabistoni valiahd shahzodasi Muhammad ibn Salmon dunyo futbolidagi eng mashhur brendlardan biri — «Barselona» klubini sotib olish niyatida ekani haqida xabarlar tarqalmoqda. El Chiringuito nashri jurnalisti Fransua Galyardo ma’lum qilishicha, ehtimoliy bitim qiymati taxminan 10 milliard yevro atrofida baholanmoqda.
Manbada ta’kidlanishicha, ushbu ulkan kelishuv yo‘lidagi eng asosiy to‘siq «Barselona»ning o‘ziga xos boshqaruv modeli — «sosyos» tizimi hisoblanadi. Ma’lumki, Kataloniya klubi oddiy xususiy mulk emas: uning a’zolari jamoaning jamoaviy egalari sanaladi va aynan ular rahbariyatni saylash, muhim qarorlarni qabul qilish hamda klub taqdiriga daxldor masalalarni hal etish huquqiga ega.
Bu esa klubni to‘liq sotib olish jarayonini ancha murakkablashtiradi. Shu bois, Goal portali ma’lumotlariga ko‘ra, Saudiya Arabistoni Davlat investitsiya jamg‘armasi alternativ variantni ham ko‘rib chiqmoqda. Ya’ni, klubni to‘liq xarid qilish o‘rniga, «Barselona»ning alohida tijoriy yoki media yo‘nalishidagi bo‘linmalariga yirik sarmoya kiritish imkoniyati o‘rganilmoqda.
Ayni paytda «ko‘k-anorranglilar» moliyaviy jihatdan qiyin davrni boshdan kechirmoqda. Ochiq manbalarga ko‘ra, klubning umumiy qarzi 2,5 milliard yevroga yaqinlashgan. Ana shu holat Saudiya sarmoyadorlarining qiziqishini yanada kuchaytirgan omillardan biri sifatida baholanmoqda.
Mutaxassislar fikricha, agar bunday kelishuv amalga oshsa, u nafaqat «Barselona», balki butun Yevropa futboli moliyaviy xaritasini o‘zgartirib yuborishi mumkin. Biroq «sosyos» tizimi sababli mazkur jarayon tez va oson kechmasligi aniq. Shuning uchun yaqin oylarda ushbu masala atrofida yana ko‘plab qiziqarli yangiliklar kutilishi shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
