Roma bosh murabbiyi Jan Piyero Gasperini nega faoliyatini davom etirish uchun aynan Rim klubini tanlagani, nega «Yuventus» variantidan voz kechgani haqida ochiq izoh berdi. Mutaxassisning so‘zlariga ko‘ra, qaror ortida nafaqat taktik hisob-kitob, balki ichki chaqiriq ham bor.
— Nima uchun «Yuventus» emas, aynan «Roma»? Chunki bu ancha murakkab yo‘l edi. Men qiyinroq vazifalarni yaxshi ko‘raman va tanlovimdan mutlaqo afsuslanmayman. «Yuventus» — har doim o‘sishga qodir, kuchli tuzilmaga ega jamoa. Ularning DNKsida doim maksimal darajada o‘ynash, g‘alaba uchun yashash bor, — dedi Gasperini.
Uning ta’kidlashicha, «Roma»da esa barcha narsani noldan qurish, jamoani yangi bosqichga olib chiqish ehtiyoji bor. Ana shu jarayon murabbiy uchun eng katta motivatsiya hisoblanadi.
Ayni paytda rimliklar mavsumni juda ishonchli o‘tkazmoqda. A Seriyaning 15-turidan keyin «Roma» 30 ochko jamg‘arib, turnir jadvalida 4-o‘rinni egallab turibdi. Peshqadam «Inter»dan orqada qolish — atigi 3 ochko.
Navbatda esa prinsipial to‘qnashuv turibdi. Keyingi turda «Roma» aynan «Yuventus»ga qarshi maydonga tushadi. Ushbu qiziqarli bellashuv 20 dekabrdan 21 dekabrga o‘tar kechasi Toshkent vaqti bilan soat 00:45 da start oladi.
Qisqasi, Gasperini oson yo‘lni emas, katta sinovni tanladi. Endi esa Rimdagi bu qaror o‘zini qay darajada oqlashini maydon ko‘rsatadi.
Mehmon guruhidagi foydalanuvchilar ushbu nashrga izoh qoldira olmaydi.
