Jahonning eng kuchli shaxmatchisi Magnus Karlsen rapid va blis musobaqalari oldidan berilgan intervyusida qisqa formatli bahslarning o‘ziga xos jihatlari, favoritlarni aniqlash qiyinligi va yosh shaxmatchilardan kutilgan hamda kutilmagan natijalar haqida ochiq fikr bildirdi.
Karlsenning ta’kidlashicha, rapid musobaqalari juda tezkor va ayrim hollarda omadga bog‘liq format hisoblanadi. Shu sababli unda aniq yetakchilarni belgilash oson emas. Ayniqsa, ayrim yetakchi shaxmatchilar ishtirok etmayotgan paytda, turnir deyarli lotereyani eslatadi. U o‘zini hisobga olmagan holda ham rapidda favoritlar qatori juda keng ekanini qayd etdi. Shu bilan birga, u blis formatini o‘zi uchun nisbatan qulay deb hisoblashini yashirmadi, chunki raundlar soni ko‘p bo‘ladi va bu barqaror o‘yin ko‘rsatishga imkon yaratadi.
Yosh shaxmatchilar haqida gapirar ekan, Magnus so‘nggi paytlarda barqaror va ishonchli o‘yin namoyon etayotgan Sindarovni alohida tilga oldi. Uning fikricha, mazkur yosh grossmeyster kutilmagan darajada yuqori natija ko‘rsatishi mumkin. Shuningdek, Gukesh ham tashqi tomondan favoritdek ko‘rinmasada, yaxshi turnir o‘tkazish salohiyatiga ega o‘yinchilar qatorida qayd etildi.
Blis musobaqasi haqida so‘z yuritar ekan, Karlsen odatda bu formatda Hikaru va Alireza yetakchi hisoblanishini tan oldi. Biroq ular ishtirok etmagan sharoitda, ko‘p raundli turnirda kim ajralib chiqishini oldindan aytish deyarli imkonsizligini ta’kidladi. Uning fikricha, aynan blitsda aniq favoritlar yo‘q.
Shu bilan birga, Karlsen ehtimoliy syurprizlarga ham ishora qildi. U Dubovni blitsda kuchli nomzodlardan biri deb hisoblashini, shuningdek, Nihal kabi shaxmatchilar ham kutilmagan natija bilan muxlislarni hayratga solishi mumkinligini aytdi.
Qisqasi, jahon chempionining fikrlari shuni ko‘rsatadiki, oldindagi rapid va blis musobaqalarida kurash juda keskin kechadi. Favoritlardan tashqari, yosh va kam tajribali o‘yinchilar ham o‘z so‘zini aytishi mumkin. Bu esa muxlislar uchun yanada qiziqarli va intrigaga boy turnirlarni va’da qilmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
