Madridning "Real" klubida bosh murabbiylik masalasi yana kun tartibiga chiqdi. Agar Xabi Alonso jamoani tark etsa, uning o‘rniga asosiy nomzod sifatida Alvaro Arbeloaning nomi tilga olinmoqda.
ESPN nashrining yozishicha, Alonsoning «qirollik klubi»dagi kelajagi hanuzgacha aniq emas. Manbalarga ko‘ra, yaqinlashib kelayotgan Ispaniya Superkubogi turniri murabbiy uchun mavsumdagi eng hal qiluvchi sinovlardan biri bo‘ladi. Aynan ushbu musobaqadagi natijalar Alonsoning taqdiriga jiddiy ta’sir ko‘rsatishi mumkin.
Klub ichidagi manbalar esa ehtimoliy almashuv variantini allaqachon muhokama qilmoqda. Ularga ko‘ra, hozirda Alvaro Arbeloa jamoa ichida eng real nomzod sifatida ko‘rilmoqda. Ayni paytda u «Real»ning ikkinchi jamoasi — «Kastilya»ga bosh murabbiylik qilmoqda va yoshlar bilan ishlashda ijobiy natijalar ko‘rsatib kelyapti.
Arbeloa klub tizimini ichi-ichidan biladigan mutaxassis hisoblanadi. U nafaqat «Real»ning sobiq futbolchisi, balki klub an’analari, talablari va bosimli muhitidan yaxshi xabardor shaxs sifatida rahbariyat ishonchiga sazovor bo‘lib ulgurgan.
Ma’lumot uchun, «Real» hozirda La Liga turnir jadvalida 18-turdan keyin 42 ochko jamg‘arib, ikkinchi o‘rinni egallab turibdi. Oldinda jamoani yana bir jiddiy sinov kutib turibdi — Ispaniya Superkubogi yarimfinalida madridliklar "Atletiko"ga qarshi maydonga chiqadi.
Qisqasi, yaqin haftalar «Real» uchun nafaqat trofeylar, balki murabbiylik kelajagi nuqtayi nazaridan ham hal qiluvchi bo‘lishi mumkin. Arbeloaning ismi esa tobora jiddiy ssenariyga aylanib bormoqda.
“Zamin”ni Telegramʻda oʻqing!
