Xalqaro futbol tarixi va statistikasi federatsiyasi — IFFHS 2025 yil yakunlari bo‘yicha dunyo futbolida eng yuqori saviya namoyon etgan futbolchilardan iborat ramziy jamoani taqdim qildi. Ro‘yxatga Yevropaning yetakchi klublari — «PSJ», «Barselona», «Real Madrid», «Manchester Siti» va «Bavariya» safida yil davomida barqaror va yuqori darajada o‘yin ko‘rsatgan yulduzlar kiritildi.
IFFHS talqiniga ko‘ra, 2025 yilning eng ishonchli darvozaboni sifatida «Manchester Siti» posboni Janluiji Donnarumma tan olindi. U mavsum davomida hal qiluvchi seyvlari va sovuqqonligi bilan jamoasiga ko‘p bor yordam berdi.
Himoya chizig‘ida esa asosiy urg‘u «PSJ» futbolchilariga berildi. Nunu Mendesh, Vilyam Pacho va Ashraf Hakimi nafaqat mustahkam himoya, balki hujumlarga faol qo‘shilishi bilan ham ajralib turdi.
Yarimhimoyada zamonaviy futbolning yuragi hisoblangan ijodkor futbolchilar joy oldi. «PSJ»dan Vitinya o‘yinni boshqarishdagi aqli va harakatlari bilan tanilgan bo‘lsa, «Barselona» safidagi Pedri hamda yosh bo‘lishiga qaramay katta sahnada porlayotgan Lamin Yamal ramziy jamoaga kiritildi.
Hujum chizig‘i esa haqiqiy yulduzlardan shakllandi. «Real Madrid»da hal qiluvchi gollari bilan jamoani yetaklagan Kilian Mbappe, «Manchester Siti»ning to‘purari Erling Holand, «Bavariya» safida samaradorlikni saqlab kelayotgan Harri Keyn hamda «PSJ»ning tezkor va texnik hujumchisi Usmon Dembele eng yaxshilar qatorida e’tirof etildi.
IFFHS tomonidan tuzilgan ushbu ramziy jamoa 2025 yilda dunyo futbolida kimlar o‘z nomini yaqqol namoyon etib, muxlislar uchun yana bir qiziqarli tahlilga aylandi.
Bundan avval, IFFHS yilning eng yaxshi murabbiylari nominatsiyasini ham e’lon qilgan edi. Klub futbolida Luis Enrike («PSJ») eng kuchli murabbiy sifatida baholangan bo‘lsa, milliy jamoalar orasida Ispaniya terma jamoasi ustozi Luis de la Fuente eng yaxshilardan deb topilgan edi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
