APL 19-turida «Liverpul» o‘z maydonida «Lids»ni qabul qildi, ammo uchrashuvda tomonlar gol ura olmadi — 0:0. Bellashuvdan keyin “qizillar” bosh murabbiyi Arne Slot durang sabablarini ochiq aytdi: jamoa yilni g‘alaba bilan boshlamoqchi edi, lekin raqibning zich himoyasi va omadsizlik rejani buzdi.
Slotning ta’kidlashicha, «Lids»ning jips himoya chizig‘ini “yozib tashlash” oson bo‘lmagan. «Liverpul» vaziyatlar yaratgan, ammo ularni golga aylantira olmagan.
«Yilni g‘alaba bilan boshlashni maqsad qilgandik, lekin bu qiyin bo‘ldi. Raqib jamoaning zich himoyasini yorib o‘tishga qiynaldik. Yaratilgan vaziyatlarda omadimiz kelmadi», — dedi Slot.
Ustoz standart vaziyatlardan ham maksimal foyda chiqarish kerakligini aytdi. Ammo bu gal kornerlar va jarima zarbalari ham ish bermagan.
«Standart vaziyatlardan foydalanishimiz kerak edi. Afsuski, hech birida gol ura olmadik. Virjil va Frimpong bilan bir necha bor yakkama-yakka vaziyatlarda gol urishga yaqinlashdik», — dedi Slot.
Ma’lumot o‘rnida, «Liverpul» ayni payt APL jadvalida 33 ochko bilan 4-o‘rinda turibdi. “Qizillar”ning keyingi sinovi 4 yanvar kuni Londonda «Fulhem»ga qarshi bo‘ladi. Qisqasi, durang — bu “fasl boshidagi tormoz”, endi esa Slot jamoasidan «Fulhem»ga qarshi o‘yinda aniqlik va samara kutyapti.
“Zamin”ni Telegramʻda oʻqing!
