«Persepolis» bosh direktori Paymon Haddodiy Igor Sergeyevni jamoaga tanishtiruv marosimida «Paxtakor»ning yana bir vakili — Hojiakbar Alijonov transferi nima uchun oxirigacha yetib bormagani haqida batafsil to‘xtaldi. Uning aytishicha, tomonlar kelishuvga juda yaqin kelgan, ammo futbolchiga Erondagi vaziyat bo‘yicha noto‘g‘ri ma’lumot yetkazilganidan keyin barcha jarayon to‘xtab qolgan.
Haddodiy avvalo Igor Sergeyev bo‘yicha kelishuvni eslab o‘tdi. Aytishicha, fors klubi o‘tgan yili O‘zbekistonda “eng yaxshi to‘purar” va “yilning eng yaxshi futbolchisi” deb topilgan Sergeyev bilan muzokara olib borgan va u jamoaga erkin agent sifatida qo‘shilgan. Shartnoma bir yarim mavsumga mo‘ljallangan. Klub rahbari Sergeyev jahon chempionatida o‘zini ko‘rsatishi, milliy jamoasiga foyda keltirishiga ishonishini ham aytdi.
Shu bilan birga, «Persepolis» o‘ng qanot himoyasi uchun «Paxtakor» futbolchisi Hojiakbar Alijonov nomzodini ham jiddiy ko‘rib chiqqan. Haddodiy “muxlislar oldida ochiqlik kerak” degan pozitsiyani urg‘ulab, internetdagi mish-mishlarga nuqta qo‘yish maqsadida raqamlar va jarayonni ochiq tushuntirdi.
Uning so‘zlariga ko‘ra, Alijonov bo‘yicha «Paxtakor»ga rasmiy xat yuborilgan. Toshkent klubi futbolchining transferi uchun 800 ming AQSH dollari talab qilgan. «Persepolis» esa 400 ming dollar to‘lashga tayyorligini bildirgan. Keyinroq tomonlar taxminan 600–650 ming dollar atrofida kelishuvga yaqinlashgan. Shu bosqichdan keyin ruxsat olinib, futbolchining o‘zi bilan muzokara boshlangan va «1,5+1» shaklidagi shartnoma bo‘yicha kelishib olingan.
Ammo eng og‘riqli qismi keyin boshlangan. Haddodiyning ta’kidlashicha, «Persepolis» qaysi futbolchi bilan muzokara boshlasa, o‘zini “eronlik” deb tanishtirgan ayrim shaxslar bu jarayonga qasddan aralashib, kelishuvni buzishga harakat qiladi. Bu holat, uning aytishicha, takrorlanadigan muammoga aylangan. Aniq shu vaziyatda esa futbolchining o‘ziga, hatto onasiga ham Erondagi vaziyatni yomon ko‘rsatish uchun turli surat va videolar yuborilgan, klubning moliyaviy ahvoli haqida asossiz ma’lumotlar tarqatilgan.
Shundan keyin muzokaralarda yangi qattiqlik paydo bo‘lgan: Haddodiy aytishicha, O‘zbekiston klubi avval kelishilganidek mablag‘ni bo‘lib to‘lash emas, uni bir yo‘la to‘lash talabini qo‘ygan. Vaziyat shu darajaga yetganki, u xavotirga o‘rin yo‘qligini tushuntirish uchun «Paxtakor» direktorlar kengashi raisi Jahongir Ortiqxo‘jayev bilan shaxsan gaplashishiga to‘g‘ri kelgan. Biroq baribir ikkilanish sezilgan.
Fors klubi rahbari buning ortida boshqa hisob-kitob ham bo‘lishi mumkinligini istisno qilmadi: ehtimol, «Paxtakor» Alijonovning haqiqiy qiymatini to‘liq anglab, uni jahon chempionatidan keyin yanada yaxshiroq takliflar orqali sotishni rejalashtirayotgandir. Shu sabab, Haddodiy fikricha, transfer umuman amalga oshmasligi ham mumkin. Lekin u muhim bir jihatni ham qo‘shib o‘tdi: klubda har bir pozitsiya uchun uchtadan tasdiqlangan variant bor, ya’ni reja “bitta futbolchiga bog‘lanib qolmagan”.
Eng keskin bayonot esa yakunda aytildi: Haddodiy transferga qasddan to‘sqinlik qilgan, Erondagi vaziyatni yomonlab ko‘rsatishga uringan shaxslarga nisbatan sud orqali chora ko‘rilishi rejalashtirilayotganini bildirdi.
Qayd etilishicha, avvalroq fors nashrlarida «Persepolis» Alijonovga Eronda 1,5 yillik shartnoma uchun 1,5 million dollar maosh taklif qilgani haqida xabarlar ham tarqalgan. Shuningdek, Igor Sergeyev ham 1,5 yillik shartnoma bo‘yicha 1,5 million dollar maosh olishi aytilgan.
Xulosa oddiy: bu tarixda pul ham bor, futbol ham bor, ammo eng ko‘p “virus” — mish-mish va atayin buzishga urinish ekan. Endi qizig‘i, «Persepolis» rostdan ham sudga chiqadimi va Alijonovning keyingi manzili qaysi taraf bo‘ladi — vaqt ko‘rsatadi.
