Saudiya Arabistonida o‘tayotgan Ispaniya superkubogida birinchi yarimfinal haqiqiy namoyishkorona spektaklga aylandi. La Liganing amaldagi chempioni va mamlakat kubogi sohibi «Barselona» «Atletik»ka deyarli hech qanday imkoniyat qoldirmay, 5:0 hisobida yirik g‘alabani rasmiylashtirdi.
7 yanvar kuni Jidda shahridagi «King Abdulla Sports City» arenasida bo‘lib o‘tgan to‘qnashuvda kataloniyaliklar birinchi daqiqalardanoq tempni yuqori qo‘ydi. O‘yinning 22-daqiqasida Ferran Torres hisobni ochdi. Oradan ko‘p o‘tmay, 30-daqiqada Fermin gol urib, ustunlikni yanada mustahkamladi. 34-daqiqada Bardakchi hisobni kattalashtirdi, 38-daqiqada esa Rafinya raqibni yana bir bor “sindirdi” — birinchi taymning o‘ziyoq «Atletik» uchun og‘ir hukm bo‘lib chiqdi.
Ikkinchi bo‘limda ham «Barselona» gazni tushirmadi. 52-daqiqada Rafinya dublni rasmiylashtirib, o‘yinga nuqta qo‘ydi. Qisqasi, maydonda “ko‘rsatma berib qo‘yishdi-yu, hammasini bajarib tashlashdi” degan manzara: raqibda javob berish uchun na vaqt, na hujum, na ruh qoldi.
Uchrashuv qahramonlari ichida Rafinya alohida ko‘zga tashlandi: u dubl ham qildi, assist ham yozdirib qo‘ydi. Fermin va Bardakchi esa bittadan gol urib, yana ikkitadan golli uzatma bilan statistikasini “chiroyli” qilib qo‘yishdi. Ya’ni, bu kecha «Barselona» hujumidagi har bir bosish “mumkin” emas, “albatta”ga o‘xshab ketdi.
Endi e’tibor ikkinchi yarimfinalga qaratildi: 8 yanvar kuni Madridning ikki azaliy raqibi — «Real» va «Atletiko» o‘zaro to‘qnash keladi. Bir tomonda — g‘urur, ikkinchi tomonda — xarakter. Jiddadagi navbatdagi kecha ham “bemaza” bo‘lmaydi, shubhasiz.
Saudiya superkubogi. Yarimfinal
Barselona — Atletik 5:0
7 yanvar. Jidda. «King Abdulla Sports City»
Gollar: Torres (22), Fermin (30), Bardakchi (34), Rafinya (38, 52).
Barselona — Joan Garsiya, Balde (Martin, 64), Kubarsi, Erik Garsiya, Kunde, De Yong (Bernal, 64), Pedri (Olmo, 72), Fermin, Bardakchi (Yamal, 72), Rafinya (Reshford, 65), Ferran.
Atletik — Simon, Areso, Vivian, Paredes, Boiro (Martines, 57), Xauregisar, Rego (Sanches, 65), Berenger, Sanset (de Galarreta, 54), Navarro (Gomes, 54), I. Uilyams (Guruseta, 54).
“Zamin”ni Telegramʻda oʻqing!
