Fransiya Superkubogida “PSJ” “Marsel”ni dramatik tarzda mag‘lub etdi. Asosiy vaqt 2:2 hisobida yakunlandi, penaltilar seriyasida esa parijliklar aniqroq bo‘lib, 4:1 natijasini qayd etdi. Bu haqda euro-football.ru xabar beradi.
Uchrashuvdan keyin “PSJ” bosh murabbiyi Luis Enrike g‘alabada omad omili ham borligini ta’kidladi. Uning aytishicha, jamoa futbolchilari va darvozabonlar murabbiylari aynan shunday lahzalar uchun tinimsiz ishlaydi.
“Bu g‘alabada omadning ham ulushi bor. Lekin futbolchilarimiz va darvozabonlar murabbiylari shunday vaziyatlar uchun mehnat qiladi. Men Shevalye va Safonov uchun xursandman: har safar gap 11 metrlik zarbalarga borib taqalsa, ular o‘z darajasini ko‘rsatadi”, — deya Enrikening so‘zlarini keltiradi Culture PSG.
O‘yinda Shevalye “Marsel” futbolchilarining ikki zarbasini qaytardi va penaltilar seriyasida muhim rol o‘ynadi. Rossiyalik Matvey Safonov esa qo‘lidagi jarohat sabab Superkubok bahsini o‘tkazib yubordi.
“Zamin”ni Telegramʻda oʻqing!
