Italiya chempionatining 16-turidan qoldirilgan uchrashuvida «Milan» safarda «Komo» mehmoni bo‘ldi. Bahs tezkor gol bilan boshlanib ketdi: mezbonlar 10-daqiqada Kempfning aniq zarbasi orqali hisobni ochdi. Biroq «rossoneri» bu zarbadan so‘ng o‘yindan chiqib ketmadi — aksincha, bosimni kuchaytirib, bahs ritmini o‘z foydasiga burib yubordi.
Uchrashuvda asosiy qahramon sifatida Fransiyalik yarimhimoyachi Adriyen Rabio ajralib turdi. U jamoasi uchun penalti ishlab berdi, keyin esa dubl qayd etib, «Milan»ga muhim uch ochkoni taqdim qildi. Birinchi taym oxirida Nkunku penaltidan hisobni tenglashtirdi (45-daqiqa), ikkinchi bo‘limda esa Rabio ikki marta «Komo» darvozasini ishg‘ol qildi — 55 va 88-daqiqalarda. Natijada «Milan» qiyin safarda 3:1 hisobida g‘alabaga erishdi.
A Seriya. 16-tur
«Komo» — «Milan» 1:3
15 yanvar, «Juzeppe Sinigalya»
Gollar: Kempf (10) — Nkunku (45, penalti), Rabio (55, 88).
Komo — Butes, Baturina (Rodriges, 60), van der Brempt, Voyvoda (Kyun, 66), da Kunya (Kakre, 60), Duvikas, Kempf (Karlos, 46), Moreno (Roberto, 76), Pas, Perrone, Ramon.
Milan — Menyan, Tomori, Gabbia, De Vinter, Salemakers (Atekame, 86), Fofana (Richchi, 70), Modrich (Yashari, 86), Rabio, Bartesagi, Nkunku (Fullkrug, 62), Leau (Loftus-Chik, 70).
Ogohlantirish: Ramon (90+1).
Bu g‘alabadan keyin Allegri jamoasi ochkolarini 43 taga yetkazib, turnir jadvalida 2-o‘rinni yanada mustahkamladi. Endi «Milan» peshqadam «Inter»dan atigi 3 ochko ortda qolmoqda. «Komo» esa 34 ochko bilan 6-pog‘onada qoldi — ular uchun mag‘lubiyat alamli, lekin mavsumdagi maqsadlar hali ham real.
Qisqasi, «Milan» bu safar xarakter ko‘rsatdi: tez gol o‘tkazib yubordi, lekin sarosimaga tushmadi. Rabio esa aynan shunday kechalar uchun olingan futbolchidek o‘ynadi — bir penalti, ikki gol va jamoa uchun “oltin” uch ochko.
“Zamin”ni Telegramʻda oʻqing!
