"Manchester Yunayted"ning sobiq yarim himoyachisi Pol Skoulz jamoa markaziy himoyachisi Garri Maguayr haqida fikr bildirdi. Bu haqda euro-football.ru xabar beradi.
32 yoshli futbolchi Maykl Karrik davrida asosiy tarkibga qaytib, "qizil iblislar"ning "Manchester Siti" ustidan 2:0 va "Arsenal"ga qarshi 3:2 hisobidagi g'alabalarida jamoaga yordam berdi.
Skoulzning ta'kidlashicha, avvalgi vaziyatini inobatga olganda, Maguayr maydonda kuchli xarakter namoyish etdi. U hatto o'z muxlislari tomonidan ham tanqid qilingani fonida bosimga bardosh bera olganini alohida qayd etdi.
"Uning maydonda qanday kurashayotganidan juda mamnunman. Hatto yana yoshargandek ko'rinmoqda: energiya bor, ishtiyoqi baland", — deya Skoulzning so'zlarini UtdDistrict keltirdi.
1 fevral, yakshanba kuni "MYU" o'z maydonida "Fulhem"ni qabul qiladi.
“Zamin”ni Telegramʻda oʻqing!
