Poytaxtimizdagi “O‘zekspomarkaz” milliy ko‘rgazmalar majmuasida futbol bo‘yicha jahon chempionati kubogining tantanali taqdimoti bo‘lib o‘tdi. Bu tadbir oddiy marosim emas — muxlislar uchun “orzuga tegib ko‘rish”ga o‘xshagan, ruhni ko‘tarib yuboradigan voqea bo‘ldi.
Taqdimotda Sport vazirligi, Milliy Olimpiya qo‘mitasi, O‘zbekiston futbol assotsiatsiyasi rahbariyati, futbol jamoatchiligi va ko‘p sonli muxlislar ishtirok etdi. Bir maydonda rasmiylar ham, futbolga jonini bergan fanatlar ham yig‘ildi — atmosfera haqiqiy bayram kayfiyatida kechdi.
Eng e’tiborli jihatlardan biri — kubok taqdimotida 2006 yilgi jahon chempioni, italiyalik Marko Materatssi ham qatnashdi. Muxlislar uchun bu alohida “fishka”: jahon futbolida o‘z izini qoldirgan afsona futbolchini yaqindan ko‘rish, bir zalda turishning o‘zi katta xotira.
Ma’lumki, jahon chempionlariga topshiriladigan kubok an’anaga ko‘ra har mundial yili jahon turi doirasida turli mamlakatlarga olib kelinadi. Joriy yildagi taqdimot esa yana bir muhim ma’no kasb etdi: u milliy terma jamoamizning jahon chempionatiga yo‘llanmani qo‘lga kiritgani bilan ham bog‘liq.
Qisqasi, bu kun futbol tariximizda yoqimli iz qoldirdi. Kubokning Toshkentda namoyish qilinishi — muxlislar uchun motivatsiya, yoshlar uchun ilhom, termamiz uchun esa yanada katta maqsadlar sari turtki. Endi eng qizig‘i oldinda: bu bayram kayfiyati maydondagi natijalarga ham kuch-quvvat bo‘lib qo‘shilsin.
“Zamin”ni Telegramʻda oʻqing!
