Chempionlar ligasining bu mavsumdagi umumiy bosqichi yakunlandi. So‘nggi tur bahslari o‘tkazildi va natijalarga ko‘ra pley-off ishtirokchilari hamda 1/8 finalga to‘g‘ridan to‘g‘ri yo‘l olgan jamoalar ham to‘liq aniq bo‘ldi.
Eng asosiy yangilik esa individual reytinglarda qayd etildi. WhoScored statistik portali ma’lum qilishicha, «Real» hujumchisi Kilian Mbappe Chempionlar ligasi umumiy bosqichining eng yaxshi futbolchisi deb topilgan.
Fransiyalik forvard raqamlar bilan ham “bahslashib bo‘lmaydigan” ko‘rsatkich qo‘ydi: u 7 ta o‘yinda 13 marta raqib darvozasini ishg‘ol qildi. Tabiiyki, bu natija uni to‘purarlar poygasida ham peshqadam qilib turibdi. Qisqacha aytganda, Mbappe bu bosqichda “gol mashinka” rejimini yoqib qo‘ygan.
O‘rtacha ballar (reyting) bo‘yicha ikkinchi o‘rinni «Barselona»ning yosh yulduzi Lamin Yamal egallagan. Uning o‘yini nafaqat natija, balki ta’sir bo‘yicha ham yuqori baholanyapti. Uchinchi pog‘ona esa «Bavariya»ning tajribali hujumchisi Harri Keynga nasib etgan.
Xulosa oddiy: umumiy bosqich tugadi, endi maydonda pley-off sur’ati boshlanadi. Lekin start nuqtasi aniq — bu bosqichning eng yorqin nomi Mbappe bo‘ldi.
“Zamin”ni Telegramʻda oʻqing!
