Bundesliganing 22-turida Ko'lnni qabul qilgan Shtutgart erta gol urib, uchrashuvni o'z nazorati ostida olib bordi va yakunda 3:1 hisobida zafar quchdi. Bu haqda euro-football.ru xabar beradi.
O'yinning 2-daqiqasidayoq Deniz Undav xavfli vaziyatga chiqdi, biroq zarba o'rniga uzatma yo'lini tanladi va darvozabon epizodni o'qib, to'pni egallab oldi. 15-daqiqada esa Jemmi Leveling hujumni keskinlashtirdi, Ermedin Demirovich esa imkoniyatdan unumli foydalanib, hisobni ochdi — 1:0.
Ikkinchi bo'limda Ko'ln javob qaytardi: 60-daqiqada Luka Valdshmidt Ragnar Aheni tezkor hujumga chiqarib yubordi, u esa darvozabon ustidan to'pni oshirib, hisobni tenglashtirdi — 1:1. Shunga qaramay, uchrashuv so'ngida Shtutgart yana o'z so'zini dedi: 84-daqiqada Ramon Hendriksning uzatmasidan keyin Demirovich dubl qayd etib, mezbonlarni yana oldinga olib chiqdi — 2:1.
Qo'shimcha daqiqalarda ham Shtutgart bosimni to'xtatmadi: Anjelo Shtiller yaratib bergan vaziyatdan Undav unumli foydalanib, yakuniy hisobni o'rnatdi — 3:1.
Ushbu g'alabadan so'ng Shtutgart turnir jadvalida yakka 4-o'ringa ko'tarildi, Ko'ln esa 11-pog'onada qoldi.
“Zamin”ni Telegramʻda oʻqing!
