Madridning «Real»i yana transfer bozorida yirik o'lja izlamoqda. Bu safar ispan matbuoti «PSJ» yarim himoyachisi Vitinyani «Santyago Bernabeu»ga olib kelish g'oyasini kun tartibiga chiqardi. The Touchline manbasiga ko'ra, portugaliyalik futbolchi «Real»ni jahon futbolidagi eng katta marralardan biri deb biladi va variantni inkor qilmaydi. Biroq vaziyat ancha murakkab: shartnoma 2029 yilgacha, narx yorlig'i 110 million yevroga yaqin, ustiga-ustak futbolchi Parijda yangi uy ham sotib olgani uning uzoq muddatga shu yerda qolayotganini anglatadi. Bu haqda euro-football.ru xabar beradi.
Ochig'ini aytganda, «Real» markaziy chiziqda kuchayishga muhtoj. Jamoa o'yinni nazorat qilish va kuchli raqiblarga qarshi jismoniy kurashda ko'p hollarda yetishmay qolmoqda. Gyuler ko'proq «maxsus holatlar» uchun saqlanadigan variantga aylanib qoldi, Kamavinga esa himoya bilan yarim himoya orasida tinimsiz ko'chib yuribdi. Bellingem ham o'tgan mavsumdagi ta'sirchan rolidan keyin hozircha barqarorlikni topa olgani yo'q.
Valverde bu tizimdagi eng ishonchli bo'g'in bo'lib qolmoqda, lekin u ham yolg'iz o'zi markazdagi umumiy muammolarni yopib bera olmaydi: kreativlik va uzatmalar sifati baribir yetishmayapti.
Vitinya esa qog'ozda «Real» ehtiyojiga juda mos keladigan nom. U pressingda faol, paslari aniq, yopiq himoyalarni ochishni biladi, maydonning ikki tomonida ham ishlaydi va bosim kuchaygan pallada ham sovuqqonlikni yo'qotmaydi. Shunday futbolchi Madridga juda qo'l kelishi mumkin.
Lekin muammo shundaki, «PSJ» uni shunchaki berib yuboradigan klub emas. Parijliklar Vitinyani jamoa loyihasining tayanch figurasi sifatida ko'radi va undan voz kechish, xuddi «Real»dan «Bernabeu»ni avtoturargoh uchun sotishni so'ragandek, deyarli imkonsiz ko'rinadi.
Fabrizio Romano ham vaziyat o'zgarmaganini ta'kidlaydi: uzoq muddatli shartnoma, yuqori maosh, jamoada muhim rol. Bunga qo'shimcha ravishda, «PSJ» shunday summa so'raydiki, hatto «Real» kabi klub ham buni oson hazm qila olmaydi. Transfermarkt Vitinyaning bozor bahosini 110 million yevro atrofida ko'rsatadi.
Mundo Deportivo tarqatgan «Real» short-listi esa go'yo Yangi yil arafasidagi istaklar ro'yxatiga o'xshaydi: Vitinya, «Manchester Siti»dan Rodri, «Chelsi»dan Enso Fernandes, «Liverpul»dan Aleksis Mak Allister, shuningdek, yosh variantlar sifatida Adam Uorton va Kes Smit ham tilga olinadi.
Eng qiziq nuqta esa «PSJ»ning pozitsiyasida: ayrim xabarlarga ko'ra, parijliklar Vitinyani faqat Rodrygo bilan almashinuv bo'lsa, muhokama qilishga tayyor. Bunga «PSJ» murabbiyi Luis Enrike braziliyalik vingerni juda xohlashi sabab bo'layotgani aytiladi. Ya'ni fransuzlar Madridga ochiq ishora qilmoqda: bizning yarim himoyachimiz kerak bo'lsa, siz ham o'z dribling ustangizni bering.
La Source Parisienne esa bu mish-mishlarni keskin sovutadi: manbaga ko'ra, Vitinya Parijda o'zini baxtli his qilmoqda, klub uni juda qadrlaydi, futbolchining o'zi esa kelajagini shu shaharda ko'rayotgani uchun ko'chmas mulk ham sotib olgan. Shu sabab «Real»ga o'tish haqidagi gaplar ko'proq ispan matbuoti yaratadigan navbatdagi serialga o'xshaydi.
Asosiy savol shunday: Vitinya «Real»ga hozir kerakmi? Albatta, u tarkibni kuchaytirardi, ijodkorlik qo'shardi, himoya bilan hujum orasida yetishmayotgan ko'prik vazifasini bajarishi mumkin.
Lekin bunday narx va sharoitda bu qanchalik oqilona? Bu pulga ikki nafar markaziy himoyachi va kelajagi porloq yosh yarim himoyachi olish mumkin. AS nashri «Real» «Komo»dan Niko Pasni 9 million yevro evaziga qaytarib olishni rejalashtirmoqda, bu esa hozirgi vaziyatda ancha mantiqli: akademiya tarbiyalanuvchisi klub falsafasini biladi va moslashuvga kamroq vaqt ketadi.
Xulosa qilib aytganda, Vitinyaning «Real»ga kelishi chiroyli orzu bo'lib turibdi, ammo uning ro'yobga chiqish ehtimoli past: «PSJ»ning qattiq pozitsiyasi, astronomik summa va oddiy mantiq bu ssenariyni murakkablashtiradi. Shunday bo'lsa-da, futbol olamida orzu qilish taqiqlanmagan.
“Zamin”ni Telegramʻda oʻqing!
