Ispaniyalik jurnalist Alvaro Kolmeneroning ma’lum qilishicha, UFC promousheni Oq uyda bo‘lib o‘tadigan turnir uchun katta “bomba” tayyorlayapti. Rejaga ko‘ra, Iliya Topuriya — Jastin Getji to‘qnashuvi aynan shu kechaning markaziy jangiga aylanishi mumkin.
Bu xabarning eng qiziq joyi — gap oddiy kardda emas. Oq uydagi turnirning o‘zi allaqachon katta shov-shuv: u 14 iyun kuni o‘tishi aytilgan va UFC bu kechani maksimal darajada “super-shou”ga aylantirishga urinyapti.
Shu bilan birga, yana bir muhim detal bor: Islom Maxachev yarim o‘rta vazn toifasidagi kamar himoyasini aynan shu turnirdan keyin o‘tkazishi mumkinligi tilga olinmoqda. Ayni paytda uning ehtimoliy raqibi sifatida Ian Garri nomi ko‘proq muhokama qilinyapti.
Manzara shunday: Oq uydagi kecha — shou va status, undan keyin esa kamar atrofida yana bir katta intriga. UFC esa hozircha "karta"ni to‘liq ochmayapti, lekin aytilgan rejalar amalga oshsa, 14 iyungi turnir haqiqiy “yil voqeasi” bo‘lib ketishi hech gap emas.
