Chempionlar ligasining pley-off bosqichida «Real» safarda «Benfika»ni 1:0 hisobida yengdi. Ammo o‘yindan keyin sarlavhalar faqat g‘alaba haqida emas, maydondagi noxush epizod haqida ham ketdi. Madrid klubi hujumchisi Vinisius Junior ijtimoiy tarmoqda post qoldirib, «Benfika»ga qarshi bahsda yuz bergan irqiy mojaroga munosabat bildirdi.
O‘yin davomida Vinisius bilan «Benfika»ning qanot himoyachisi Janluka Prestianni o‘rtasida tortishuv chiqqan. «Real» futbolchilari, jumladan Kilian Mbappe, argentinalik o‘yinchi Vinisiusni o‘yin vaqtida 5 marta “maymun” deb ataganini aytgan.
Vinisius esa bu holatga qattiq va ochiq baho berdi. U irqchilikni qo‘rqoqlik deb atab, bunday odamlar o‘zini “qaxramon” qilib ko‘rsatmaslik uchun yuzini berkitishga majbur bo‘lishini ta’kidladi. Uning fikricha, eng og‘ir tomoni — ba’zan bunday harakatlar vaqtida aybdorning o‘zi emas, boshqalar uni “himoya” qilib qolayotgani. Vinisius aynan shu yerda tizim ham mas’ul bo‘lishi kerakligini, irqchilikka nisbatan jazo va reaksiya qattiq bo‘lishi shartligini uqtirdi.
Braziliyalik hujumchi yana bir jihatga to‘xtaldi: u gol urgandan keyin sariq kartochka olganini yozdi va hali ham nima uchun ogohlantirilganini tushunmayotganini bildirdi. Ya’ni, u uchun bu kecha faqat g‘alaba emas, tushunarsiz qarorlar va og‘ir kayfiyat bilan ham yodda qolgan.
Vinisius postida shunday ma’no bor: u bunday vaziyatlarga tushishni umuman xohlamaydi, ayniqsa katta o‘yinda g‘alaba qozongan paytda diqqat markazi «Real Madrid»ning o‘yini va natijasi bo‘lishi kerak. Lekin u bu mavzudan qochmaslikni tanladi — chunki sukut ham ba’zan “ruxsat” bo‘lib qoladi.
Muxlislar uchun bu voqea yana bir bor eslatma: futbol faqat gol va ochko emas, madaniyat ham. Maydondagi ehtirom yo‘qolsa, o‘yinning mazasi ham ketadi. Shuning uchun ham bunday holatlar ochiq aytilsa, gapirilsa, reaksiya bo‘lsa — bu “shovqin” emas, tozalash.
Eng to‘g‘ri ssenariy oddiy: g‘alabalar sarlavhalarni egallasin, irqchilik esa stadiondan ham, futboldan ham yo‘qolsin. Va bu yo‘lda bir o‘yinchi gapirsa, ertaga boshqalar ham jim turmaydi — o‘zgarish ana shundan boshlanadi.
