Angliya chempionatining 31-turidan o‘rin olgan, muddatidan oldin o‘tkazilgan bellashuvda peshqadam "Arsenal" kutilmagan to‘siqqa uchradi. Londonliklar jadvalning eng quyi qatorida turgan "Vulverhempton" bilan safarda 2:2 hisobida durang o‘ynab, ikki to‘plik ustunlikni saqlab qola olmadi.
Uchrashuv 18 fevral kuni Molinyu stadiumida bo‘lib o‘tdi va o‘yin boshidan “Arsenal” o‘zini ishonchli tuta boshladi. 5-daqiqaning o‘zida Bukayo Saka hisobni ochib, mehmonlarga tezkor ruhiy ustunlik berdi. Ikkinchi bo‘lim boshida esa “kanonirlar” yana bir bor zarba berdi: 57-daqiqada Pero Hinkapi to‘p kiritib, farqni ikkiga chiqardi — shu yerda ko‘pchilik “tamom, o‘yin yopildi” deb o‘ylagan.
Lekin futbol aynan shunday: “yopildi” degan o‘yin bir lahzada “ochiladi”. 61-daqiqada Ugo Bueno “Vulvz”ni o‘yinga qaytardi. Mezbonlar bosimni oshirib, oxirgi daqiqalarda ham umidni uzmadi. Va dramaning eng “og‘ir” nuqtasi 90+4 daqiqada keldi: “Arsenal” himoyachisi Rikkardo Kalafiori o‘z darvozasiga avtogol kiritib qo‘ydi — natijada londonliklar g‘alabani qo‘ldan chiqarib, ikki ochkoni maydonda qoldirdi.
APL. 31-tur
Vulverhempton — Arsenal 2:2
18 fevral, «Molinyu stedium»
Gollar: U.Bueno (61), Kalafiori (90+4, avtogol) — Saka (5), Hinkapi (57).
Vulverhempton — Sa, Mockera, S.Bueno, Kreychiy, Chachtua (Gomesh, 70), Gomes (Arokodare, 22), Andre, U.Bueno, Mane, Belgard (Edozi, 84), Armstrong.
Arsenal — Rayya, Timber, Saliba, Gabriel, Hinkapi, Subimendi, Rays, Madueke (Eze, 65), Saka (Trossar 77, Kalafiori 90+3), Martinelli, Gokeresh (Jezus, 65).
Ogohlantirishlar: S.Bueno (45+4), Belgard (71), Jezus (90+9).
Shu durangdan keyin ham “Arsenal” 58 ochko bilan peshqadamlikni saqlab turibdi. Ammo ta’qibchi "Manchester Siti"da 53 ochko va bir zaxira o‘yini bor — demak, chempionlik poygasida nervlar endi yanada qattiq sinovdan o‘tadi. “Vulvz” esa 10 ochko bilan so‘nggi pog‘onada qolyapti, biroq bu durang ular uchun “ha, biz ham tirikmiz” degan signal bo‘ldi.
Qisqasi, Mikel Arteta jamoasi uchun bu bahs g‘alaba emas — qattiq ogohlantirish: Premer-ligada hatto oxirgi o‘rindagi jamoa ham sening xatoyingni kechirmaydi. Endi “Arsenal”ga asosiy vazifa — bunday “kuydiruvchi” daqiqalarni takrorlamaslik, aks holda chempionlikka ketadigan yo‘lda har bir yo‘qotilgan ochko qimmatga tushadi.
