APLning 27-turida “Manchester Siti” o‘z maydonida “Nyukasl”ni 2:1 hisobida yengib, muhim uch ochkoni qo‘lga kiritdi. Ushbu bahs nafaqat g‘alaba, balki o‘zbek muxlislari uchun yana bir yoqimli jihat bilan esda qoldi: hamyurtimiz Abduqodir Husanov ikkinchi taym boshida maydonga tushib, mustahkam va xotirjam o‘yini bilan e’tiborni tortdi.
Bellashuvning tanaffusidan keyin Gvardiola Ruben Diash o‘rniga Husanovni maydonga tushirdi. Bu qaror “Siti”ning orqa chizig‘ida tartib va ishonchlilikni ushlab turishga xizmat qildi. Abduqodir esa imkoniyatdan maksimal foydalanib, vaziyatlarni to‘g‘ri o‘qiydigan, xavfli hujumlarni barvaqt sezib to‘xtatadigan himoyachi sifatida ko‘rindi.
E’tiborlisi, bir qator statistik portallar ham Husanovning harakatlarini munosib baholadi. Jumladan, SofaScore o‘zbekistonlik himoyachiga 7 ball qo‘ygan bo‘lsa, FotMob 6,6 ball, Flashscore esa 6,8 ball bilan uning o‘yinini yuqori qayd etdi. Bu raqamlar — oddiy “ball” emas, bu maydondagi ishonch, to‘g‘ri qaror va bosim ostida ham sovuqqonlik degani.
Foto: Sofascore
Manchesterdagi bahsda dublga erishgan Niko O‘Rayli o‘yinning eng yaxshi futbolchisi deb topildi — 8,7 ball. Rodri esa 8,6 ball bilan o‘yinning eng yaxshi ikkinchi futbolchisi bo‘ldi.
Yana bir muhim nuqta: Husanovning maydonga tushishi faqat “o‘ynab berdi” degan gap emas. U jamoa tarkibidagi raqobatni ham qizdiryapti. Chunki bunday o‘yindan keyin murabbiylar shtabida “keyingi o‘yinda ham shans beramizmi?” degan savol paydo bo‘lishi tabiiy.
Ma’lumot uchun, «Siti» g‘alabadan so‘ng peshqadam «Arsenal»dan ikki ochkoga ortda qolmoqda. “Shaharliklar” navbatdagi turda “Lids”ga qarshi bellashadi. Ushbu uchrashuv 28-fevral kuni bo‘lib o‘tadi. Demak, Husanov uchun yangi imkoniyat eshigi yana ochiq — endi eng muhimi, bu formani yo‘qotmaslik va har daqiqaga “men shu yerga bekor kelmaganman” degan kayfiyatda chiqish.
“Zamin”ni Telegramʻda oʻqing!
