Chempionlar ligasida hal qiluvchi palla yaqinlashar ekan, Madridning “Real” klubi bosh murabbiyi Alvaro Arbeloa “Benfika”ga qarshi javob bahsi oldidan matbuot anjumanida o‘z fikrlarini bildirdi. Uning so‘zlaridan bilinishicha, jamoa “Bernabeu”dagi o‘yinni oddiy uchrashuv emas, balki katta imtihon, hatto finalga teng kecha sifatida qabul qilmoqda.
Arbeloa “Real”ning javob o‘yinidagi rejasi ham aniq ekanini yashirmadi: jamoa Lissabondagi bahsga o‘xshash uslubda maydonga tushishini xohlaydi.
— “Real” qanday bo‘ladi? Lissabondagi o‘yinga juda o‘xshash. Men shuni xohlayman va shuni kutyapman. Bu alohida o‘yin, “Bernabeu”dagi buyuk Chempionlar ligasi oqshomi bo‘ladi. Muxlislar qo‘llab-quvvatlashi naqadar muhimligini bilamiz, — dedi u.
Murabbiyning ta’kidlashicha, jamoaning asosiy maqsadi bitta: g‘alaba qozonib, keyingi bosqichga yo‘l olish. Shuning uchun ham barcha diqqat, butun energiya aynan shu bellashuvga yo‘naltirilgan.
— Biz g‘alaba qozonib, keyingi bosqichga chiqishni o‘ylayapmiz. Hissiyotlar juda ko‘p. “Bernabeu”dagi buyuk oqshomdan zavqlanishni istaymiz. Tikilgan narsa juda katta. Ko‘pincha “Bu final”, deyishadi. Haqiqatan ham shunday bo‘ladi. Barcha kuch va energiyamiz aynan shu o‘yinga qaratilgan, — deya qo‘shimcha qildi Arbeloa.
Eslatib o‘tamiz, ilk uchrashuvda “Real” safarda “Benfika”ni 1:0 hisobida mag‘lub etgan edi. Demak, madridliklar javob bahsiga minimal, ammo qimmatli ustunlik bilan chiqadi. Ammo Chempionlar ligasida “bir gollik farq” hech qachon xotirjamlik bermaydi — shuning uchun “Bernabeu”dagi kecha haqiqatan ham finaldek kayfiyatda o‘tishi kutilyapti.
“Zamin”ni Telegramʻda oʻqing!
