Ispaniya Kubogi yarim final javob bahsida “Barselona” o‘z maydonida 3:0 hisobida g‘alaba qozondi. Lekin bu natija kataloniyaliklarga final eshigini ochib bermadi: sababi, birinchi uchrashuvda Diyego Simeone shogirdlari raqibni 4:0 hisobida yer tishlatgan, umumiy hisob esa “Atletiko” foydasiga hal bo‘lgan edi.
O‘yindan keyin maydonda kayfiyat og‘ir bo‘ldi: “Barselona” futbolchilari tushkun, muxlislar esa “nima bo‘ldi o‘zi?” degan savol bilan qoldi. Ana shu fon ortida madridliklar hujumchisi Antuan Grizmann ijtimoiy tarmoqlarda “tezkor zarba” berib qo‘ydi.
Fransiyalik yulduz “Barselona”ning ikki futbolchisi maydonda yotgan kadrlari fonida o‘zining nishonlayotgan suratini joyladi va ustiga qisqa, lekin qattiq gap yozdi:
“Juda qattiq tegdimi, a?”
Bu post shunchaki emotsiya emas, ortda esa “eski xotira” turibdi. 2025-yil mart oyida “Barselona” La Ligada safarda “Atletiko”ni fantastik ssenariyda yenggan edi: 72-daqiqagacha 0:2 yutqazib turib, oxirida 4:2 qilib ketgan. O‘shanda kataloniyaliklar matbuot xizmati Grizmann suratini xuddi shu ma’nodagi “qadab qo‘yilgan” izoh bilan tarmoqqa chiqargandi.
Oradan bir yil o‘tib, bu safar rollar almashdi: “Barselona” 3:0 yutdi, ammo baribir finaldan quruq qoldi. Grizmann esa aynan shu og‘riqli nuqtani topib, “o‘ch”ni post orqali qaytardi.
Futbolda gohida hisobdan ham ko‘ra qattiqroq narsa bor: xotira. Va Grizmann bu xotirani jonli efirdek qayta yoqib yubordi.
“Zamin”ni Telegramʻda oʻqing!
