Antoine Griezmann yakshanba kuni Atletiko Madrid muxlislari bilan koʻz yoshlar bilan xayrlashdi. Fransiyalik hujumchi oʻzining soʻnggi uy uchrashuvidan foydalanib, avvalroq Barselona jamoasiga oʻtib ketgani uchun muxlislardan chin dildan uzr soʻradi. Yozda MLS vakili Orlando City safiga oʻtishi kutilayotgan futbolchi 2019-yilda Ispaniya poytaxtini tark etib, xatoga yoʻl qoʻyganini tan oldi. Bu haqda Goal.com xabar beradi.
Jirona ustidan qozonilgan 1:0 hisobidagi gʻalabadan soʻng tashkil etilgan xayrlashuv marosimida Griezmann mikrofon qarshisiga chiqib, muxlislarga murojaat qildi. Klub tarixidagi eng yaxshi toʻpurarga aylangan 35 yoshli futbolchi yetti yil avval 120 million yevro evaziga Camp Nouga oʻtishi bilan bogʻliq mojaroni oydinlashtirishni istadi. U oʻsha paytda yosh boʻlgani va xato qilganini, keyinchalik esa oʻz xatosini anglab yetib, klubga qaytganini taʼkidladi.
Griezmann oʻz faoliyati davomida Yevropa ligasi va Fransiya terma jamoasi bilan Jahon chempionligini qoʻlga kiritgan boʻlsa-da, Atletiko bilan La Liga yoki Chempionlar ligasi kubogini yuta olmaganidan afsusda. Shunga qaramay, u muxlislarning mehrini har qanday sovrindan ustun qoʻyishini aytdi. "Men La Liga yoki Chempionlar ligasi chempionligini keltira olmadim, ammo bu mehr barcha sovrinlardan qimmatroq", - dedi u stadiondagi soʻnggi nutqida.
Atletiko bosh murabbiyi Diego Simeone oʻzining yetakchi futbolchisini yuqori baholab, uni "klub tarixidagi eng yaxshi oʻyinchi" deb atadi. Griezmann ham oʻz navbatida argentinalik mutaxassisga minnatdorchilik bildirib, aynan Simeone qoʻl ostida dunyoning eng yaxshi futbolchilaridan biriga aylanganini va u bilan birga kurashish sharaf boʻlganini taʼkidladi.
“Zamin”ni Telegramʻda oʻqing!
