Ispaniyalik yosh iqtidor egasi, "Barselona" klubi hujumchisi Lamine Yamal uchun Adidas kompaniyasi navbatdagi maxsus butsalarni taqdim etdi. "Heartbreaker" deb nomlangan ushbu model futbolchining o'zi bilan hamkorlikda ishlab chiqilgan bo'lib, u Kataloniyaning an'anaviy "Dia de Sant Jordi" bayramiga bag'ishlangan. Bu haqda goal.com xabar beradi.
Ushbu bayram har yili 23-aprelda nishonlanadi va u romantika hamda adabiyot ramzi hisoblanadi. Butsalarning dizaynida oq rang fonida ochilayotgan atirgul tasviri aks etgan. Tovon qismida esa "Football's Heartbreaker" logotipi joylashgan bo'lib, bu Yamalning maydondagi chaqqon va raqib himoyachilarini sarosimaga soladigan o'yin uslubiga ishora qiladi.
Yamal atigi 18 yoshda bo'lishiga qaramay, allaqachon Adidas brendining eng nufuzli elchilaridan biriga aylandi. Bu uning faoliyatidagi uchinchi shaxsiy butsa hisoblanadi. Texnik jihatdan yangi F50 modellari "Fibretouch" va "Sprintweb" texnologiyalari bilan jihozlangan bo'lib, ular yuqori tezlikda to'p bilan ishlashda futbolchiga maksimal qulaylik yaratadi.
Yangi butsalarda ilk bor "Atletiko Madrid"ga qarshi Ispaniya Kubogi doirasidagi bahsda maydonga tushgan yosh yulduz, o'yin davomida assist qayd etishga muvaffaq bo'ldi. Garchi "Barselona" ushbu uchrashuvda mag'lubiyatga uchragan bo'lsa-da, Yamal o'zining yangi ekipirovkasi bilan kelgusi o'yinlarda yanada yorqin natijalarni ko'rsatishga umid qilmoqda.
“Zamin”ni Telegramʻda oʻqing!
