"Barselona" bosh murabbiyi Xans-Diter Flikning kelajagi borasida kutilmagan xabarlar tarqaldi. Jurnalist Florian Plettenbergning ma'lum qilishicha, nemis mutaxassisi klub prezidenti Joan Laporta lavozimini tark etgan taqdirda, o'zi ham jamoa bilan xayrlashishga qaror qilishi mumkin. Flik hozirgi rahbariyat bilan ishlashdan mamnun va kelgusidagi strategik rejalarni aynan Laporta bilan birga amalga oshirmoqchi.
Ma'lum bo'lishicha, Flik Barselona shahri, klub muhiti va muxlislarga juda bog'lanib qolgan. U shartnomasini uzaytirishdan manfaatdor, biroq uning qolishi 15 mart kuni bo'lib o'tadigan prezidentlik saylovlari natijalariga bevosita bog'liq. Agar Laporta qayta saylanmasa, murabbiy yozda yoki 2027 yilda shartnomasi yakunlangach, jamoani tark etish variantini ko'rib chiqmoqda.
Ayni damda Xans-Diter Flik qo'l ostidagi "Barselona" ajoyib sport formasida. Ispaniya chempionatining 26-turidan so'ng, kataloniyaliklar 64 ochko bilan turnir jadvalida yaqqol peshqadamlik qilmoqda. Jamoaning muvaffaqiyatli o'yinlari fonida yuzaga kelgan bu vaziyat muxlislarni xavotirga solishi tabiiy.
“Zamin”ni Telegramʻda oʻqing!
