"Barselona" hujumchisi Robert Levandovski o'zining kelgusi rejalari borasida oydinlik kiritdi. 37 yoshli tajribali futbolchi Sky Sports nashriga bergan intervyusida yaqin uch oy ichida faoliyatini qayerda davom ettirish bo'yicha yakuniy qarorga kelishini ma'lum qildi. Uning so'zlariga ko'ra, oilasi bilan Ispaniyada o'zini juda baxtli his qilmoqda va klubdagi sharoitlar uni to'liq qoniqtirmoqda.
Polshalik hujumchining kataloniyaliklar bilan imzolagan amaldagi shartnomasi joriy yilning iyun oyida o'z nihoyasiga yetadi. Levandovski joriy mavsumda "Barselona" safida barcha musobaqalarda 32 ta uchrashuvda maydonga tushib, raqiblar darvozasiga 14 ta gol urishga muvaffaq bo'ldi. Shuningdek, u jamoadoshlariga 1 ta golli uzatma ham amalga oshirdi.
Ayni damda "Barselona" Ispaniya chempionatida yetakchilik qilmoqda. Jamoa hisobida 64 ochko mavjud bo'lib, ular eng yaqin ta'qibchisi bo'lgan "Real Madrid" klubidan atigi 1 ochko oldinda bormoqda. Chempionlik poygasi qizg'in pallaga kirgan bir vaqtda, Levandovskining kelajagi borasidagi noaniqlik muxlislar va mutaxassislar e'tiborida qolmoqda.
“Zamin”ni Telegramʻda oʻqing!
